ევროკავშირის მაღალჩინოსნების მიმართ ბელარუსის სანქციების სია რუსეთში იმოქმედებს. ამის შესახებ რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ განაცხადა. მან ეს მოკავშირეობის ვალდებულებებით განმარტა.

ზახაროვას თქმით, ევროკავშირის სანქციები ბელარუსის ხელისუფლებაზე მიუღებელი ზეწოლაა.

"ვხედავთ, რომ თავშეკავების გამოჩენის ნაცვლად, რომელიც ბელარუსში სიტუაციის სტაბილიზაციისთვის ასე მნიშვნელოვანია, ევროკავშირი კვლავ სანქციების ინსტრუმენტს იყენებს. რომელიც არის ცალმხრივი და არალეგიტიმური, რადგან ძირს უთხრის გაეროს უშიშროების საბჭოს პრეროგატივებს და საერთაშორისო სამართლის შემდგომ ეროზიას იწვევს", — განაცხადა ზახაროვამ.

დღეს, 2 ოქტომბერს ბელარუს მაღალჩინოსნებს სანქციები დაუწესა ევროკავშირმაც. სიაში 40 პირია შეყვანილი. მათ შორის პრეზიდენტი ალექსანდრ ლუკაშენკო არაა.

ევროკავშირის მიერ დაწესებული სანქციების საპასუხოდ ბელარუსი ქვეყანაში ევროპელ მაღალჩინოსნებაც აუკრძალავს. თუმცა როგორ ისინი ხსნიანს, დიპლომატიური პროტოკოლის შესაბამისად, სიას არ გაასაჯაროებენ.

აგვისტოს ბოლოს ევროკავშირის ქვეყნებმა ბელარუსის საპრეზიდენტო არჩევნების შედეგები არ აღიარეს. ისინი ბელარუსის ხელისუფლებას ახალი არჩევნების ჩატარებისკენ მოუწოდებენ.

ევროკავშირის ერთობლივი სანქციებისგან განსხვავებით, კანადამ და დიდმა ბრიტანეთმა ინდივიდუალურ სანქციებში ალექსანდრ ლუკაშენკოც შეიყვანეს. სიები გამოაქვეყნეს ბალტიისპირეთის ქვეყნებმაც.

ბელარუსის ზოგიერთ მაღალჩინოსანს სანქციები დაუწესა აშშ-მაც. სიაში მოხვდნენ შინაგან საქმეთა მინისტრი იური კარაევი და მისი მოადგილეები, ცენტრალური საარჩევნო კომისიის თავმჯდომარის მოადგილე ვადიმ იპატოვი და ე.წ. ომონის ხელმძღვანელი დმიტრი ბალაბა.