დიდი ბრიტანეთის ევროკავშირიდან გასვლის (Brexit) მოთხოვნას ქვეყნის 306-მა წამყვანმა ბიზნესმენმა მოაწერა ხელი. მათი განცხადებით, ბრიტანეთის ევროკავშირში ყოფნა ძირს უთხრის ქვეყნის კონკურენტუნარიანობას. წერილი, რომელშიც ბიზნესმენები განმარტავენ, თუ რატომ უნდა დატოვოს ბრიტანეთმა ევროპის კავშირი, Telegraph-ში გამოქვეყნდა.

ბიზნესმენების აზრით, წლიდან წლამდე ევროკავშირი უფრო და უფრო ცოტა პროდუქტს ყიდულობს ბრიტანეთისგან, რადგან მისი ეკონომიკა სტაგნაციას განიცდის და მილიონობით ადამიანი უმუშევარი რჩება. ინგლისის ბანკის ყოფილი მმართველის, მერვინ ქინგის განმარტებით კი, ევრო შესაძლოა სულ მალე "აფეთქდეს" კიდეც. ბრიუსელის წითელი ლენტი კი 5,4 მილიონ ბრიტანულ ბიზნესს ახშობს, მიუხედავად იმისა, რომ ბიზნესის მცირე ნაწილს სავაჭრო ურთიერთობა ევროკავშირთან მაინც აქვს:

"სწორედ ბიზნესი და არა მთავრობაა ის, ვინც დოვლათს ჩვენი ხაზინისა და სამუშაო ადგილების შექმნისათვის აწარმოებს. ევროკავშირის გარეთ ბრიტანული ბიზნესი თავისუფალი იქნება იმისთვის, რომ გაიზარდოს, შექმნას ახალი ბაზარი და სამუშაო ადგილები. დროა, მხარი დავუჭიროთ ბრიტანეთის ევროკავშირიდან გასვლას".

მოსაზრებას, რომ ბრიტანეთის მიერ ევროკავშირის დატოვება ქვეყანას კატასტროფას მოუტანს, არასწორს უწოდებს კონსერვატორული პარტიის ყოფილი ხაზინადარი, ლორდი ფარმერი და განმარტავს, რომ ბრიტანეთი, თავისი ეკონომიკური მდგომარეობით, მეხუთე ადგილზე იმყოფება და ის დარწმუნებული უნდა იყოს იმაში, რომ სხვა ქვეყნებს მასთან თავისუფალი ვაჭრობის სურვილი გაუჩნდებათ, განსაკუთრებით იმ შემთხვევაში, თუ ისინი უკვე აკეთებენ ამას ისევე, როგორც ევროკავშირი. მისი თქმით, ევროპას ბრიტანეთთან დაახლოებით 70 მილიარდი ფუნტის დადებითი სალდო აქვს და არანაირი მიზეზი არ არსებობს იმისთვის, რომ ბარიერები შეიქმნას:

"ევროკავშირის ქვეყნებსაც არ ენდომებათ, რომ წვდომა შეეზღუდოთ ლონდონის ბაზარზე. Canary Wharf მარტო უფრო დიდ ბიზნესს ქმნის, ვიდრე ფრანკფურტი. ჩვენ მსოფლიოსათვის ევროპის ფინანსურ გამოსავალს წარმოვადგენთ. თუ ლონდონი "გაიზრდება", ყველა სარგებელს მიიღებს".

მისი თქმით, ბრიტანეთის ევროკავშირიდან გასვლის მხარდაჭერით, დემოკრატიის დაბრუნება გახდება შესაძლებელი, რაც ყველასათვის მომგებიანი იქნება:

"ბრიუსელი წუწუნს დაიწყებს, მაგრამ ვეჭვობ, რომ ევროპელი ხალხი ნასიამოვნები დარჩება".

2016 წლის 23 ივნისს ბრიტანელები რეფერენდუმის საშუალებით გადაწყვეტენ ევროკავშირიდან გასვლის საკითხს. ნაწილი მიიჩნევს, რომ ქვეყნის მიერ ევროპის კავშირის დატოვება სასარგებლო იქნება, მოქალაქეთა მეორე ნაწილს კი ჰგონია, რომ აღნიშნული გადაწყვეტილება რისკებთან არის დაკავშირებული.

ბრიტანეთის პრემიერ მინისტრის, დევიდ კამერონს კი იმედი აქვს, რომ ბრიტანელების უმრავლესობა მხარს ევროკავშირში დარჩენას დაუჭერს.