რუსული სამთავრობო გამოცემები ოცნების ლიდერის, მამუკა მდინარაძის მიერ 27 მარტს გაკეთებულ განცხადებას ციტირებენ და წერენ, რომ საქართველოში სააკაშვილის პარტია აიკრძალება.

"საქართველოს ყოფილი პრეზიდენტის, მიხეილ სააკაშვილის მიერ დაარსებული პარტია ერთიანი ნაციონალური მოძრაობა და მასთან დაკავშირებული პარტიები არაკონსტიტუციურად გამოცხადდება და არჩევნებში მონაწილეობას ვეღარ მიიღებს", — ციტირებს მდინარაძეს TASS-ი.

მათვე თქმით, მდინარაძემ ხაზგასმით აღნიშნა, მთავარი ოპოზიციური პარტიები "არაკონსტიტუციურად გამოცხადდება როგორც ანტიქართული, ანტისახელმწიფოებრივი, ანტიეროვნული და კრიმინალური და აეკრძალება ფუნქციონირება".

გარდა ამისა, როგორც მდინარაძემ აღნიშნა, პარლამენტში უკვე შევიდა კანონპროექტი, რომლის მიხედვითაც არსებული ძირითადი ოპოზიციური პარტიების მემკვიდრე პარტიები არაკონსტიტუციურად გამოცხადდეს, თუ მათი შემადგენლობა ან მიზნები იდენტურია.

კიდევ ერთი რუსული სამთავრობო გამოცემა RBK ასეთი სათაურის სტატიას აქვეყნებს: "ქართული ოცნება სააკაშვილის პარტიის აკრძალვის პირობას იძლევა". მათ სურთ სააკაშვილის „ერთიანი ნაციონალური მოძრაობის“ არაკონსტიტუციურად გამოცხადება და პარტიას ქვეყანაში ნებისმიერ არჩევნებში მონაწილეობის აკრძალვა.

შეგახსენებთ, 27 მარტს მამუკა მდინარაძე ოპოზიციურ პარტიებს აკრძალვით კიდევ ერთხელ დაემუქრა.

მისი თქმით, "კოლექტიური ნაციონალური მოძრაობა" არათუ თვითმმართველობის არჩევნებში, არამედ ამ ქვეყანაში ჩატარებულ ვერცერთ არჩევნებში ვეღარ მიიღებს მონაწილეობას. როგორც ანტიქართული, ანტიკონსტიტუციური, ანტიეროვნული და დანაშაულებრივი პარტიები, ისინი ანტიკონსტიტუციურ პარტიებად გამოცხადდებიან და აეკრძალებათ საქმიანობა