"ვმუშაობთ პროექტზე, რომელიც ლარის გადარიცხვისას VISA/Mastercard-ის გავლენას შეამცირებს", - ამის შესახებ საქართველოს ეროვნული ბანკის საბჭოს ვიცეპრეზიდენტმა, ეკატერინე გალდავამ 27 მარტს საპარლამენტო სხდომაზე განაცხადა. კომენტარს ტაბულა ავრცელებს.

გალდავას თქმით, ეს პროექტი ამჟამად განხილვის სტადიაშია და მას მინიმუმ ერთი წელი დასჭირდება.

"არ შემიძლია არ აღვნიშნო მეოთხე პროექტიც, თუმცა ის მხოლოდ განხილვის სტადიაშია, ეს არის National Switch-ის პროექტი - ყველამ ვიცით რა არის ბარათი და თუ შეგვიმჩნევია, მათზე მხოლოდ VISA და Mastercard არის დაწერილი, ის ლარში გადარიცხვები, რომლებიც ხორციელდება ჩვენს ტერიტორიაზე ლარშიც კი, ხორციელდება უცხოური პროვაიდერების მიმართ, რომელთა ოფისებიც არის სხვა ქვეყანაში, თუმცა ჩვენთანაც არიან კარგად წარმოდგენილი, მაგრამ ჩვენ მივედით იქამდე, რომ ამ ინფრასტრუქტურის ამ ეტაპზე ჯერ დანერგვის და არ ქონის გამო ძირითადად ეს ყველაფერი არის VISA და Mastercard-ის მეშვეობით განხორციელებული. ანუ ის გამოცდილება, რომელიც სხვა ქვეყნებში საკმაოდ დიდია, ვცდილობთ გადმოვიტანოთ და ალბათ წელიწად-ნახევარში ორ წელიწადში ეს პროექტები წარმატებით დასრულდება" — თქვა გალდავამ.

სხდომის დროს ბანკის ვიცეპრეზიდენტს დაუსვეს კითხვა, თუ როგორ იმუშავებს ღია ბანკინგის სისტემა ბარათებთან დაკავშირებულ საკომისიოებზე: "მალე, ალბათ, შესაძლებელი იქნება ბარათის ნაცვლად პირდაპირ მივაბათ ანგარიში, VISA-ს და Mastercard-ს ასობით მილიონი ლარი საკომისიო აქვთ ქვეყნიდან გატანილი. კითხვა ზუსტად ასეთია, გამოიწვევს თუ არა ეს ღია ბანკინგის ჩართვა, და ალბათ გამოიწვევს, რომ ქვეყნიდან ეს თანხა აღარ გავა და პირიქით, ჩვენს ეკონომიკაში დატრიალდება?" — თქვა ვატო თურნავამ

საპასუხოდ, ეკატერინე გალდავამ აღნიშნა, რომ ამჟამად სწორედ ამ მიმართულებით მუშაობენ.

"ერთი წელი მაინც დასჭირდება ამის გაკეთებას, მარტივი პროექტი არ არის. ვცდილობთ, საბარათე ბიზნესზე დამოკიდებულება ცოტა შევამციროთ. ვგულისხმობთ, რომ ჩვენი მენტალობა, ჩვენი მოსახლეობა უნდა გადავიდეს ანგარიშის უფრო კარგ მფლობელობაზე, კარგად უნდა ესმოდეს, რომ მისი ანგარიშის გამოყენება ბევრად უფრო უსაფრთხო იქნება და არაა აუცილებელი ყველგან ბარათი გვქონდეს"- თქვა ეკატერინე გალდავამ.