ქართული ოცნების ერთ-ერთი ლიდერი, მამუკა მდინარაძე ისევ ოპოზიციური პარტიების აკრძალვით იმუქრება. მისი თქმით, "ნაცმოძრაობა" და მისი სატელიტი პარტიები ანტიკონსტიტუციურ პარტიებად გამოცხადდებიან და აეკრძალებათ საქმიანობა.

"კოლექტიური ნაციონალური მოძრაობა" არათუ თვითმმართველობის არჩევნებში, არამედ ამ ქვეყანაში ჩატარებულ ვერცერთ არჩევნებში ვეღარ მიიღებს მონაწილეობას. როგორც ანტიქართული, ანტიკონსტიტუციური, ანტიეროვნული და დანაშაულებრივი პარტიები, ისინი ანტიკონსტიტუციურ პარტიებად გამოცხადდებიან და აეკრძალებათ საქმიანობა", — განახადა მამუკა მდინარაძემ.

მისი თქმით, ოპოზიციური პარტიები ჯერ კიდევ ლაპარაკობენ იმაზე, რომ თვითმმართველობის არჩევნებში მონაწილეობას არ მიიღებენ, სინამდვილეში კი, ისინი არჩევნებში მონაწილეობას ვერ მიიღებენ, რასაც ქართული სახელმწიფო უზრუნველყოფს.

მდინარაძემ ისიც თქვა, რომ ამ ეტაპზეც კი იკვეთება, რომ საგამოძიებო კომისიის დასკვნა ამ პარტიების არაკონსტიტუციურად გამოცხადების მყარი სამართლებრივი საფუძველი გახდება.

"მათი დავალებით ისინი ჯერ კიდევ ლაპარაკობენ, რომ არ მიიღებენ მონაწილეობას თვითმმართველობის არჩევნებში. სინამდვილეში კი განა არ მიიღებენ, ვერ მიიღებენ თვითმმართველობის არჩევნებში მონაწილეობას! ამას უზრუნველყოფს ქართული სახელმწიფო და მისი კონსტიტუციური წესრიგი", — თქვა მდინარაძემ.