ბალტიის ქვეყნებში ვიზიტის ფარგლებში, საქართველოს მე-5 პრეზიდენტი სალომე ზურაბიშვილი ესტონეთის პრეზიდენტს, ალარ კარის შეხვდა.

ამის შესახებ ინფორმაციას სალომე ზურაბიშვილის პრესსამსახური ავრცელებს.

სალომე ზურაბიშვილი ესტონეთში ვიზიტს X-ზე გამოეხმაურა. ის წერს, რომ "ესტონეთი ჩვენთან ერთად დგას ჩვენს ევროპულ გზაზე".

"ბალტიისპირეთის ქვეყნებში ვიზიტი ესტონეთში გრძელდება საქართველოსადმი ურყევი მხარდაჭერით. ესტონეთი ჩვენთან ერთად დგას ჩვენს ევროპულ გზაზე და მხარს უჭერს ქართველი ხალხის მოწოდებას ახალი, თავისუფალი და სამართლიანი არჩევნების შესახებ", — წერს სალომე ზურაბიშვილი X-ზე.

ესტონეთის პრეზიდენტთან შეხვედრამდე სალომე ზურაბიშვილი ლატვიის პრეზიდენტს, ედგარს რინკევიჩსაც და ლიეტუვის პრეზიდენტს, გიტანას ნაუსედასაც შეხვდა.