ამერიკელი მწერალი ლიზა ჯეინ სმითი, რომელსაც მსოფლიოში ყველაზე მეტად ვამპირის დღიურების წიგნების სერიით იცნობდნენ, 66 წლის ასაკში გარდაიცვალა. სმითის პარტნიორის ცნობით, მწერალი ათწლეულზე მეტხანს ებრძოდა იშვიათ ავტოიმუნურ დაავადებას, რომლის გართულებების შედეგადაც 8 მარტს საავადმყოფოში გარდაიცვალა.

ლ.ჯ. სმითი ფენტეზის, სამეცნიერო ფანტასტიკისა და საშინელებათა ჟანრების 20-ზე მეტი წიგნის ავტორი იყო. მისი აგენტის თქმით, ჯანმრთელობის მდგომარეობის მიუხედავად, მწერალი სიცოცხლის ბოლომდე აგრძელებდა მუშაობას და სამი გამოსაქვეყნებელი რომანი დატოვა.

სმითის უდავოდ ყველაზე ცნობილი სერია ვამპირის დღიურები გახლავთ, რომლის გამოცემაც მან 1991 წელს დაიწყო. თუმცა, წიგნებმა განსაკუთრებული პოპულარობა თითქმის 20 წლის შემდეგ მოიპოვა, როცა მათ მიხედვით იმავე სახელწოდების სერიალის გადაღება დაიწყო. წიგნშიც და სერიალშიც მთავარი გმირი სკოლის მოსწავლე ელენა გილბერტია, რომელიც მე-19 საუკუნიდან გადმოსული ვამპირი ძმების, დეიმონ და სტეფან სალვატორეების, სასიყვარულო სამკუთხედში აღმოჩნდება. სერიის ეკრანიზაციაში მთავარი როლები ნინა დობრევმა, იენ სამერჰოლდერმა და პოლ უესლიმ შეასრულეს. ტელესერიალად იქცა სმითის კიდევ ერთი პოპულარული წიგნების სერია, საიდუმლო წრე.

ფოტო: CBS / Warner Bros.

ვამპირის დღიურები კი დღემდე რჩება ვამპირული ჟანრის ერთ-ერთ ყველაზე ცნობილ ნიმუშად. 2014 წლის მონაცემებით, სერიის წიგნები მსოფლიოში 5 მილიონზე მეტ ეგზემპლარადაა გაყიდული. საგის პირველი ოთხი რომანი თარგმნილია ქართულადაც.

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...