ნეტფლიქსმა წელს დაგეგმილ თავის კინოპრემიერებს შორის ერთ-ერთი ყველაზე საინტერესო პროექტიდან — Ma Rainey’s Black Bottom პირველი კადრები გაავრცელა.

კინომოყვარულებისთვის მნიშვნელოვანი სხვა დეტალების გარდა, ეს ფილმი საყურადღებოა იმის გამოც, რომ მასში ამერიკელი მსახიობი ჩედვიკ ბოუზმენი თამაშობს, რაც ამ ხელოვანის უკანასკნელი სამსახიობო შესრულება აღმოჩნდა: შეგახსენებთ, რომ ბოუზმენი 28 აგვისტოს 43 წლის ასაკში გარდაიცვალა.

როგორც ახლახანს გავრცელებულ ფოტოებში ვხედავთ, შავი პანტერას ვარსკვლავი სუპერგმირის ფორმის ნაცვლად ამჯერად მომხიბვლელ ვინტაჟურ სამოსშია გამოწყობილი.

ფოტო: Netflix

ჩედვიკ ბოუზმენთან ერთად ამ ახალ ფილმში მონაწილეობს ვაიოლა დევისიც, რომელიც ბლუზის შემსრულებელს განასახიერებს.

ბოუზმენი სწორედ დევისის პერსონაჟის შეყვარებულისა და საყვირზე დამკვრელის როლს ასრულებს.

ფოტო: Netflix

Ma Rainey’s Black Bottom-ის სიუჟეტი 1927 წლის ჩიკაგოში ვითარდება და როგორც იმდროინდელი ამერიკის მუსიკას აცოცხლებს ეკრანებზე, ისე რასიზმისა და პირადი ურთიერთობების პრობლემებზე მოგვითხრობს.

ფილმი პულიცერის პრემიის მფლობელი ავტორის ავგუსტ უილსონის ამავე სახელწოდების მქონე პიესის მიხედვით შეიქმნა.

ფოტო: Netflix

კინოსურათი ჯორჯ უოლფმა გადაიღო, რომელსაც წარსულში ისეთ ცნობილ პროექტზე აქვს ნამუშევარი, როგორიცაა Angels in America. მთავარი პროდიუსერი კი ცნობილი მსახიობი დენზელ ვაშინგტონია.

"ის შესანიშნავი მსახიობი იყო და მოულოდნელად დაგვტოვა, კვლავ არ შემიძლია ამის დაჯერება", — განაცხადა ვაშინგტონმა ბოუზმენის გარდაცვალებასთან დაკავშირებით.

რეჟისორი ჯორჯ უოლფი გადასაღებ მოედანზე ვაიოლა დევისთან და ჩედვიკ ბოუზმენთან ერთად.

ფოტო: Netflix

აღსანიშნავია, რომ ეს ერთადერთი ახალი ფილმი არ არის, რომელსაც მაყურებელი წელს ჩედვიკ ბოუზმენის მონაწილეობით იხილავს: 12 ივნისს გამოვიდა ასევე ნეტფლიქსთან თანამშრომლობით გადაღებული სპაიკ ლის ახალი ფილმი Da 5 Bloods, რომელიც ვიეტნამის ომის შესახებ მოგვითხრობს და მასში მთავარ როლს სწორედ შავი პანტერას ვარსკვლავი ასრულებს.

ბოუზმენის უკანასკნელი შესრულების ხილვა 18 დეკემბრიდან შეგვეძლება: სწორედ მაშინ შედგება Ma Rainey’s Black Bottom-ის პრემიერა ნეტფლიქსის პლატფორმაზე.

Ma Rainey’s Black Bottom

ფოტო: Netflix