სტრატეგია აღმაშენებლის ლიდერი, გიორგი ვაშაძე ამბობს, რომ ოპოზიციური საერთო ფრონტის მთავარ ჩამშლელად ყველა ნაციონალურ მოძრაობას ხედავს. ამის შესახებ მან რუსთავი 2-ის ეთერში ისაუბრა.

მისი თქმით, ექსპრეზიდენტმა მიხეილ სააკაშვილმა დიდი შეცდომა დაუშვა, როცა საკუთარი თავი პრემიერობის კანდიდატად წარადგინა. როგორც ვაშაძე განმარტავს, სწორედ ამის გამო ნაციონალური მოძრაობა ცდილობს მისი შეცდომა გამოასწოროს, საიდანაც გამომდინარეობს მათი განცხადებები და თავდასხმები.

"IRI-ს კვლევას ხო ყველა ვენდობით. ჩვენი, სტრატეგია აღმაშენებლის მხარდაჭერა და რეიტინგი გაიზარდა მათი, ნაცმოძრაობის შემცირდა. რატომ იცით? იმიტომ, რომ ოპოზიციური საერთო ფრონტის მთავარ ჩამშლელად ყველა ხედავს ნაციონალურ მოძრაობას. ეს არის მათი პრობლემა. როცა ამბობ, რომ ხარ მთავარი ოპოზიციური ძალა, შეგირცხვეს ცხვირი, როცა ოპოზიციას ესხმი თავს. გაასწორე სამიზნე. დამსხვრეული ოცნებების პარტია და ბიძინა ივანიშვილიაა ამ ქვეყნის მტერი და არა ოპოზიციური პარტიები. ამაშია მათი სიმხდალე და არასწორი ქმედება. ამაშია მათი ცრუ, ვითომ ბრძოლა ოპოზიციის გამარჯვებისთვის", — განაცხადა გიორგი ვაშაძემ.

20 სექტემბერს, მიხეილ სააკაშვილმა TV პირველის ეთერში განაცხადა, რომ ის მხოლოდ საზოგადოების კოალიციას ხედავს და არ ხედავს პარტიულ კოალიციას. მისი თქმით "პოლიტიკური პარტიების და პარტიუკების" საერთოდ არ სჯერა. სააკაშვილმა, ასევე, აღნიშნა, რომ 2020 წლის საპარლამენტო არჩევნებზე უმრავლესობას ან ნაციონალური მოძრაობა აიღებს ან საქართველო "დაიღუპება". ამასთან, ჟურნალისტის კითხვას: "აქვს თუ არა ამომრჩეველს მხოლოდ ორი არჩევანი, თქვენ ან ბიძინა ივანიშვილი?" ყოფილმა პრეზიდენტმა უპასუხა, რომ ასეა და ეს ყველამ კარგად იცის.

თუმცა სააკაშვილმა ეს მიდგომაც შეცვალა და დღეს ამტკიცებს, რომ ის და მისი პარტია "ინკლუზიური" მთავრობის მომხრე არიან. ეს განცხადება მან მას შემდეგ გაავრცელა, რაც ოპოზიციამ გააკრიტიკა იმის გამო, რომ "კოალიციური" მთავრობა არ სურდა.

ამავე თემაზე: