ევროპული საქართველოს ერთ-ერთი ლიდერი, ფოთის, ხობისა და სენაკის მაჟორიტარობის კანდიდატი, გიგა ბოკერია, მიხეილ სააკაშვილის განცხადებას ეხმაურება.

გიგა ბოკერიას თქმით, დღეს არჩევანი არის მათ შორის, ვისაც სურს ერთპიროვნული მმართველობა ან მასში დაბრუნება და მათ შორის, ვისაც გარდამტეხი ცვლილებები სჭირდება. ბოკერიამ აღნშნა, რომ სააკაშვილის განცხადებები პირდაპირ არის ივანიშვილის პროპაგანდის გზავნილი.

"სააკაშვილმა განაცხადა, რომ არჩევნები მხოლოდ მასსა და ივანიშვილს შორის არის, ეს არის ერთი-ერთში ივანიშვილის პროპაგანდის გზავნილი, ამ კაცის თითქმის ყველა გამოსვლა არის საჩუქარი ივანიშვილის პროპაგანდისათვის, განსაკუთრებით მერამდენედ დაანონსება ჩამოსვლის და შემდეგ გადაგდება იმ ხალხის, ვისაც დაპირდა ამას. რაც მთავარია, ეს არის სიცრუე. არჩევანი არის იმათ შორის, ვისაც მხოლოდ თავისი ძალაუფლება აინტერესებს — ივანიშვილს, რომელსაც დღევანდელი ჭაობის შენარჩუნება სურს და სააკაშვილის, რომელსაც წარსულში დაბრუნება სურს და მეორეს მხრივ, ქართული საზოგადოების უდიდეს ნაწილს შორის, რომელსაც უნდა ცვლილებები, გარდამტეხი ცვლილებები და რისი გეგმაც გვაქვს ჩვენ, ევროპულ საქართველოს. აი ეს არის არჩევანი, იმათ შორის ვისაც მხოლოდ თავისი ძალაუფლება აინტერესებს და იმათ შორის, ვისაც სურს რომ ქვეყანაში მოხდეს ცვლილებები და წინსვლა", — განაცხადა გიგა ბოკერიამ.