რესპუბლიკური პარტიის წევრი, თამარ კორძაია ამბობს, რომ ამომრჩეველს მრავალპარტიული, კოალიციური მთავრობის ხილვა სურს და ამას კვლევებიც ადასტურებს. კორძაია ექსპრეზიდენტი მიხეილ სააკაშვილის განცხადებას გამოეხმაურა, რომელმაც განაცხადა, რომ კოალიციურ მთავრობა ვერ ხედავს.

რესპუბლიკური პარტია საარჩევნო ბლოკის, ძალა ერთობაშიას წევრია, რომელიც ნაციონალური მოძრაობის გარშემო გაერთიანდა და პრემიერომინისტრობის კანდიდატად, მიხეილ სააკაშვილი წარადგინა.

"მიხეილ სააკაშვილმა, ალბათ, ყველაზე კარგად იცის, რას ნიშნავს ამომრჩევლის ნება და 2012 წლის არჩევნების შემდეგ იგი დამორჩილდა ნებას. ამიტომ, შეიძლება მისი სურვილია მოახდინოს ამომრჩევლის მობილიზება, მაგრამ ჩატარებული კვლევები ადასტურებს, რომ ამომრჩევლის ნება არის მრავალპარტიული, კოალიციური მთავრობის შექმნა... არ უნდა დავშინდეთ არც ერთი პოლიტიკოსის განცხადებით, რადგან ამომრჩეველი გაცილებით ჭკვიანურად აფასებს", — განაცხადა კორძაიამ.

გუშინ, 20 სექტემბერს, მიხეილ სააკაშვილმა TV პირველის ეთერში განაცხადა, რომ ის მხოლოდ საზოგადოების კოალიციას ხედავს და პარტიულს არა. მისი თქმით "პოლიტიკური პარტიების და პარტიუკების" საერთოდ არ სჯერა. სააკაშვილმა, ასევე, აღნიშნა, რომ 2020 წლის საპარლამენტო არჩევნებზე უმრავლესობას ან ნაციონალური მოძრაობა აიღებს ან საქართველო "დაიღუპება". ამასთან, ჟურნალისტის კითხვას: "აქვს თუ არა ამომრჩეველს მხოლოდ ორი არჩევანი, თქვენ ან ბიძინა ივანიშვილი?" ყოფილმა პრეზიდენტმა უპასუხა, რომ ასეა და ეს ყველამ კარგად იცის.

სააკაშვილის ამ განცხადების პასუხად ევროპული საქართველოს ერთ-ერთმა ლიდერმა, სერგი კაპანაძემ განაცხადა, რომ ექსპრეზიდენტს არ აინტერესებს ივანიშვილის მარცხი, თუ ერთპიროვნულად არ მოვა ხელისუფლებაში. გირჩის ლიდერმა, ზურა ჯაფარიძემ კი აღნიშნა, რომ სააკაშვილს ივანიშვილის მარცხი იმაზე მეტად არ სურს, ვიდრე ძალაუფლების კვლავ ხელში ჩაგდება.