ევროპული საქართველოს ლიდერი, გიგა ბოკერია მიიჩნევს, რომ ნაციონალურ მოძრაობას გონივრულ კომპრომისზე წასვლა მოუწევს, რადგან ის არჩევნებზე 50 პროცენტზე მეტი ხმის დაგროვებას ვერ შეძლებს. ამის შესახებ მან ფორმულასთან საუბრის დროს განაცხადა.

"უკვირდათ, კონკურენტი პარტიის მიერ ნომინირებულ პრემიერობის კანდიდატს [სააკაშვილს] ევროპული საქართველო რატომ არ უჭერს მხარსო, რა თქმა უნდა, არ ვუჭერთ. იმიტომ ვართ სხვადასხვა პარტია, რომ სხვადასხვა ხედვა გვაქვს. თუ რომელიმე ძალა, მაგალითად, ნაციონალური მოძრაობა, 50 პროცენტზე მეტს აიღებს, ვისაც უნდა იმას წარადგენს პრემიერად, ეს მათი უფლებაა, მაგრამ ვიცით ყველამ, რომ ვერც ერთი ძალა ვერ მიიღებს 50 პროცენტზე მეტს, ამიტომ ყველას მოუწევს გონივრულ კომპრომისზე წასვლა", — აცხადებს ბოკერია.

მან დაამატა ისიც, რომ მიხეილ სააკაშვილი არ არის ის ფიგურა, რომლის გარშემოც ამ ტიპის კონსოლიდაცია მოხერხდება და ვერავინ გაბედავს თქმას, "მე ვინც მინდა ის თუ არ იქნება პრემიერი, ბიძინას დავტოვებთო".

წინასაარჩევნოდ ექსპრეზიდენტმა, მიხეილ სააკაშვილმა ვიდეომიმართვა გაავრცელა, სადაც საქართველოს მოსახლეობას დაშვებული შეცდომების გამო ბოდიშს უხდის. ექსპრეზიდენტი ისევ ჰპირდება ამომრჩეველს დაბრუნებას, თუმცა წინა დაპირებებისგან განსხვავებით, არ აკონკრეტებს როდის.

ამ დრომდე სააკაშვილმა არაერთხელ განაცხადა, რომ საქართველოში დაბრუნდებოდა და "ივანიშვილის მმართველობას დაასრულებდა". ამას ჰპირდებოდა ის ამომრჩეველს, როგორც თვითმართველობის, ასევე, საპრეზიდენტო არჩევნების წინ.