ნაციონალური მოძრაობის თავმჯდომარე რომან გოცირიძე არ გამორიცხავს, რომ პარტიამ მიხეილ სააკაშვილი პრემიერმინისტრობის კანდიდატად დააყენოს. მისი თქმით, ამ გადაწყვეტილების მიღებამდე სააკაშვილის პასუხს ელოდებოდნენ.

"მიხეილ სააკაშვილის პრემიერმინისტრობის კანდიდატად დასახელებას სჭირდებოდა მისი გეგმების ცოდნა. მას სერიოზული როლი აკისრია უკრაინაში და აღებული აქვს შესაბამისი ვალდებულებები. ამიტომ ამ საკითხის განხილვისას მისი ნათელი პოზიციის გაგება იყო აუცილებელი. დღევანდელი განცხადება იმის თაობაზე, რომ იგი ბრუნდება საქართველოში და ერთვება პოლიტიკურ ცხოვრებაში, ბევრ რამეს სცემს პასუხს. რაც შეეხება იმას, ვის დააყენებს პარტია პრემიერ მინისტრის კანდიდატად? ვნახოთ, სააკაშვილი ლოგიკური იქნებოდა", — აცხადებს გოცირიძე On.ge-სთან საუბრისას.

კითხვაზე, მიიღებს თუ არა ქართველი საზოგადოება მიხეილ სააკაშვილს, კიდევ ერთხელ, ასეთ მნიშვნელოვან პოზიციაზე, გოცირიძე პასუხობს, რომ ამას არჩევნები გადაწყვეტს.

რაც შეეხება სტრატეგია აღმაშენებლის ლიდერის, გიორი ვაშაძის სურვილს იყოს პრემიერმინისტრი, გოცირიძე ამბობს:

"გიორგი ვაშაძის პრეტენზია არ იყო რეალური მისი პარტიის რეალურ წონაზე დაფუძნებული".

ექსპრეზიდენტმა, მიხეილ სააკაშვილმა ვიდეომიმართვა გაავრცელა, რომელშიც საქართველოს მოსახლეობას ბოდიში მოუხადა. სააკაშვილი აღიარებს, რომ მისი მმართველობის პერიოდში იყო "ძალიან მძიმე შეცდომები", თუმცა იქვე ამატებს, რომ ხალხისთვის უკეთესი, "ბევრად მდიდრული" ცხოვრება უნდოდა.

ვიდეომიმართვაში, რომელიც სააკაშვილმა წინასაარჩევნოდ გაავრცელა ხაზგასმულია ისიც, რა გააკეთა ქვეყნისთვის და ისიც, რომ ახლა გასაკეთებელი კიდევ ბევრია. ის ისევ ჰპირდება ამომრჩეველს დაბრუნებას, თუმცა წინა დაპირებებისგან განსხვავებით, არ აკონკრეტებს როდის.