ბრიტანულმა გამოცემა ინდიფენდენტმა ცოტა ხნის წინ გაავრცელა ინფორმაცია იმის შესახებ, რომ უკრაინისა და საქართველოს მოქალაქეებს ევროპაში უვიზოდ მოგზაურობა უკვე შეუძლიათ. მიმზიდველმა, თუმცა, არასწორმა ინფორმაციამ, არაერთი ადამიანი შეიყვანა შეცდომაში.

სინამდვილეში, ევროკავშირის საბჭომ, ევროპარლამენტმა და ევროკომისიამ ერთობლივ მოლაპარაკებაზე 7 დეკემბერს მიაღწიეს შეთანხმებას ე.წ. შეჩერების მექანიზმის ამოქმედების შესახებ.

ევროპარლამენტი დღეს შუადღისას გადაწყვეტს იმას, მომავალ კვირას ჩატარდება თუ არა კენჭისყრა განახლებული შეჩერების მექანიზმისათვის. კენჭისყრაზე დადებითი შედეგის მიღების შემდეგ კი, კიდევ ერთი ხმის მიცემა გაიმართება პლენარულ სხდომაზე ვიზალიბერალიზაციის მინიჭების საკითხზე.

თავის მხრივ, მექანიზმის ამოქმედება გზას ხსნის საქართველოსა და უკრაინისთვის, მიიღონ ვიზების ლიბერალიზაცია.

ამ დრომდე სწორედ ამ მექანიზმის არარსებობა უშლიდა ხელს ვიზების ლიბერალიზაციას უკრაინისა და საქართველოსთვის.

რა არის შეჩერების მექანიზმი?

შეჩერების გამარტივებული მექანიზმის ამოქმედება, ევროკავშირის წევრ ქვეყნებში, საჭიროების შემთხვევაში ჭარბ მიგრაციულ ნაკადებს შეაჩერებს. იგი საშუალებას აძლევს წევრ ქვეყნებს, რომ ევროკომისიას მოთხოვოს დროებით შეაჩეროს უვიზო მიმოსვლა იმ ქვეყნისთვის, საიდანაც მკვეთრად გაიზრდება არალეგალი მიგრანტების რაოდენობა და თავშესაფრის მოთხოვნები. ევროკავშირის განცხადებით შეჩერების მექანიზმი არის "აუცილებელი" და საქართველო ვერ მიიღებს სავიზო ლიბერალიზაციას მის ამოქმედების გარეშე.