მაყურებელი ჰოლივუდის სამ ლეგენდარულ მსახიობს — კეტი ბეიტსს, მეგი სმიტსა და ლორა ლინს ახალ ფილმში The Miracle Club ერთად იხილავს.

ფილმს ირლანდიელი რეჟისორი თადეოს ო'სალივანი გადაიღებს, რომელსაც მაყურებლები ფილმებით December Bride (1991) და Into the Storm (2009) იცნობენ. სცენარზე კი ტიმოთი პრაგერი და ჯიმი სმოლჰორნი იმუშავებენ.

ფილმის სიუჟეტი სამი დუბლინელი ქალის ირგვლივ განვითარდება, რომლებიც საფრანგეთში მოგზაურობისას ერთმანეთთან ძლიერ მეგობრულ კავშირს დაამყარებენ და თითოეული მათგანის პირად ცხოვრებაში მოულოდნელად განვითარებული მოვლენების მომსწრენიც გახდებიან.

"The Miracle Club გასაოცარი ქალების სიძლიერეზე, სიყვარულსა და წინააღმდეგობაზე მოგვითხრობს, რომლებიც ერთმანეთთან მეგობრობისა და ნდობის წყალობით საკუთარ თავებს ხელახლა აღმოაჩენენ", — განაცხადა ფილმის პროდიუსერმა ჯოშ მაურერმა.

ოსკაროსანი კეტი ბეიტსი და მეგი სმიტი კინოსამყაროში უკვე ლეგენდარულ სახეებად არიან აღიარებულნი, ოსკარის სამ გზის ნომინანტი ლორა ლინი კი მაყურებლებმა ბოლო პერიოდში ნეტფლიქსის ერთ-ერთ ყველაზე გახმაურებულ სერიალში Ozark იხილეს.

ლორა ლინი სერიალში Ozark.

ფოტო: Netflix

ფილმის გადაღებები 2021 წელს დუბლინში უნდა დაიწყოს, მისი პრემიერა კი 2022 წელსაა დაგეგმილი და ეს პროცესი პანდემიამ თუ არ შეაფერხა, ორ წელში მაყურებელს ამ სამი გამორჩეული მსახიობის ეკრანზე ერთად ხილვა შეეძლება.