საერთაშორისო გამჭვირვალობა – საქართველოს დაკვეთით 2016 წლის გაზაფხულზე ჩატარდა საზოგადოებრივი აზრის გამოკითხვა, რომლის მიზანიც კორუფციასთან დაკავშირებული საკითხების მიმართ მოსახლეობის დამოკიდებულების შესწავლა იყო.

კვლევის შედეგების მიხედვით, 2016 წელს გამოკითხულთა 40% მიიჩნევს, რომ პირადი მიზნების მისაღწევად საჯარო მოხელეების მიერ თანამდებობების ბოროტად გამოყენება გავრცელებულია. 2015 წელთან შედარებით ეს მაჩვენებელი 15%-ით, 2013 წელთან შედარებით კი 28%-ით არის გაზრდილი.

TI-ის ცნობით, კითხვაზე, რამდენად გავრცელებულია, ან რამდენად არ არის გავრცელებული საჯარო მოხელეების მიერ თანამდებობის ბოროტად გამოყენება პირადი მიზნების მისაღწევად?, გამოკითხულთა 40% პასუხობს, რომ გავრცელებულია, 11% კი მიიჩნევს, რომ ეს პრობლემა გავრცელებული არ არის. 2015 წელს ამავე კითხვაზე 25% პასუხობდა, რომ ეს პრობლემა გავრცელებულია, 17% კი მიიჩნევდა, რომ გავრცელებული არ არის. 2013 წელს ანალოგიური მაჩვენებელი, შესაბამისად, 12%-ს და 33%-ს შეადგენდა.

როგორც საერთაშორისო გამჭვირვალობა - საქართველო ამბობს, განსხვავებული მდგომარეობაა დაბალ დონეზე კორუფციის (მექრთამეობის) კუთხით. კვლევის თანახმად, კითხვაზე, “ბოლო 12 თვის განმავლობაში მოუთხოვიათ თუ არა თქვენგან ქრთამი, იქნებოდა ეს ფულადი თუ არაფულადი, სახელმწიფო მომსახურებისთვის?”, რესპონდენტთა 99% პასუხობს, რომ მათგან ქრთამი არ მოუთხოვიათ. 2015 წელს აღნიშნული მაჩვენებელი 99%-ს, 2013 წელს კი 95%-ს შეადგენდა. კვლევის ასეთი შედეგი მიუთითებს, რომ საქართველოში დაბალ დონეზე კორუფციის (მექრთამეობის) პრობლემა კვლავაც არ დგას.

TI აცხადებს, რომ დაბალ დონეზე კორუფციის (მექრთამეობის) მაჩვენებელი კვლავ მინიმალურია. თუმცა, ის ფაქტი, რომ საჯარო მოხელეების მიერ თანამდებობის პირადი მიზნების მისაღწევად ბოროტად გამოყენებას საზოგადოება სულ უფრო პრობლემურად მიიჩნევს, მიუთითებს ანტიკორუფციული კანონმდებლობისა და მისი აღსრულების მექანიზმების დახვეწის აუცილებლობაზე. განსაკუთრებით, ეს მაღალ დონეზე არსებულ კორუფციულ რისკებს ეხება.

საზოგადოებრივი აზრის გამოკითხვა 2016 წლის 16-28 მარტის პერიოდში საერთაშორისო გამჭვირვალობა - საქართველოს დაკვეთით კავკასიის კვლევითი რესურსების ცენტრმა (CRRC) ჩაატარა. გამოკითხვაში 2 032 ადამიანი მონაწილეობდა და ცდომილების საშუალო ზღვარი 3,2%-ია.