იაპონიის პოლიციამ აშშ-ის 2 მოქალაქე დააკავა მას შემდეგ, რაც ერთ-ერთი მათგანი ინტერნეტვარსკვლავად ქცეული მაიმუნის ვოლიერში გადახტა, მეორე კი მას ვიდეოს უღებდა.

ერთ-ერთ დაკავებულს, რომელიც აცხადებს, რომ 24 წლის სტუდენტია, პანჩის ვოლიერში შესაღწევად ღობის უკანონოდ გადალახვა ედება ბრალად. მეორე დაკავებული, როგორც თავად ამბობს, 27 წლის მომღერალია.

ბრალდებებს ორივე მათგანი უარყოფს. პოლიციის ინფორმაციით, შემთხვევის დროს მაიმუნები არ დაშავებულან — დაკავებულები ცხოველებთან ახლოს არ მისულან, რადგან ისინი ზოოპარკის თანამშრომლებმა მალევე შეაჩერეს.

სხვა დამთვალიერებლების მიერ გავრცელებულ კადრებში ჩანს, რომ სპეციალურ კოსტიუმში გამოწყობილი პირი, რომელსაც ხელში რბილი სათამაშო უჭირავს, ღობიდან ვოლიერში ხტება. როგორც ცნობილია, აღნიშნული კოსტიუმი ერთ-ერთი კრიპტოვალუტის რეკლამირებას ემსახურებოდა.

ვიდეოში ასევე ჩანს, თუ როგორ გამოჰყავს ვოლიერში შეჭრილი პირი ზოოპარკის მომთვინიერებელს ტერიტორიიდან. ადგილობრივი მედიის ცნობით, კაცები ბიზნესის საქმიანობისთვის ხელის შეშლის მუხლით არიან დაკავებულნი.

ზოოპარკი აპირებს, რომ მომავალში მსგავსი შემთხვევების თავიდან ასარიდებლად მკაცრი ზომები მიიღოს. განიხილავენ მაიმუნების ვოლიერთან გადაღების სრულ აკრძალვას. ასევე, დროებით შეჩერებულია იუთუბერების მოთხოვნები გადაღებებთან დაკავშირებით.

აღსანიშნავია, რომ ეს არ არის პირველი შემთხვევა, როცა ადამიანები ინტერნეტსენსაციად ქცეული ცხოველების ვოლიერებში იჭრებიან. გასულ თვეში, ტაილანდში $300-ით დააჯარიმეს პირი, რომელიც პოპულარული ჯუჯა ჰიპოპოტამის, მუ დენგის, ვოლიერში შევიდა.