განახლებული შეჩერების მექანიზმზე ევროკავშირის საბჭო, კომისია და პარლამენტი ვერ შეთანხმდა. სავარაუდოდ, მსგავსი შეხვედრა მომავალ კვირასაც გაიმართება. ამის შესახებ ბრიუსელში რადიო თავისუფლების კორესპონდენტი რიკარდ იოზვიაკი ტვიტერის საკუთარ გვერდზე წერს.

დღეს, 29 ნოემბერს, ბრიუსელში სამმხრივი მოლაპარაკება გაიმართა, უკრაინის, კოსოვოსა და საქართველოსთვის შეჩერების მექანიზმზე შესათანხმებლად.

ამასთან, ევროპარლამენტის ოფიციალურმა საიტმა შეჩერების მექანიზმის განხილვის სავარაუდო თარიღი - 2017 წლის 18 იანვარი გამოაქვეყნა.

წინასწარი ინფორმაციით, იანვრის სესიაზე ევროდეპუტატები შესაბამისი რეგლამენტის განხილვას პირველი მოსმენით გეგმავენ.

გუშინ, 28 ნოემბერს ევროკომისარმა გაფართოებისა და სამეზობლო პოლიტიკის ურთიერთობის საკითხებში იოჰანეს ჰანმა საზოგადოებრივი მაუწყებლის ჟურნალისტთან ქეთევან ქარდავასთან საუბრისას განაცხადა, რომ საქართველოს ვიზალიბერალიზაციის საკითხზე პარლამენტი და ევროპული საბჭო დროებითი შეჩერების მექანიზმზე შეთანხმებას შობამდე შეძლებს:

"მე ყოველთვის ოპტიმისტი ვარ. ვფიქრობ, რომ ძალიან ბევრს მივაღწიეთ. მაქვს ძალიან დიდი იმედი, რომ პარლამენტი და ევროპული საბჭო დროებითი შეჩერების მექანიზმზე შეთანხმებას შობამდე შეძლებს. როგორც უკვე არაერთხელ აღვნიშნეთ, დროებითი შეჩერების მექანიზმი წინაპირობაა ვიზალიბერალიზაციისთვის. შეთანხმების შემდეგ ტექნიკური მხარე დარჩება. შესაძლოა, პარლამენტში კენჭისყრა თებერვალში ან მარტში შედგეს. დაგვჭირდება დრო გადაწყვეტილების აღსასრულებლად და დოკუმენტების თარგმანი, რასაც დაახლოებით ერთი ან ორი თვე დასჭირდება".

რა არის შეჩერების მექანიზმი?

შეჩერების გამარტივებული მექანიზმის ამოქმედება, ევროკავშირის წევრ ქვეყნებში, საჭიროების შემთხვევაში ჭარბ მიგრაციულ ნაკადებს შეაჩერებს. იგი საშუალებას აძლევს წევრ ქვეყნებს, რომ ევროკომისიას მოთხოვოს დროებით შეაჩეროს უვიზო მიმოსვლა იმ ქვეყნისთვის, საიდანაც მკვეთრად გაიზრდება არალეგალი მიგრანტების რაოდენობა და თავშესაფრის მოთხოვნები. ევროკავშირის განცხადებით შეჩერების მექანიზმი არის "აუცილებელი" და საქართველო ვერ მიიღებს სავიზო ლიბერქალიზაციას მის ამოქმედების გარეშე.