საგარეო საქმეთა სამინისტრო აცხადებს, რომ რუსეთის ფედერაციის ქმედება, რუსეთ-აფხაზეთის სამხედრო დაჯგუფების შექმნის შესახებ, ემსახურება საქართველოს ოკუპირებული რეგიონების საბოლოო ანექსიას.

საგარეო საქმეთა სამინისტრო გმობს რუსეთის ფედერაციის ქმედებას და აცხადებს, რომ იგი მიმართულია სახელმწიფოს ტერიტორიული მთლიანობისა და საერთაშორისოდ აღიარებული საზღვრების ურღვეობის წინააღმდეგ

საგარეო საქმეთა სამინისტრო მოუწოდებს რუსეთის ფედერაციას, პატივი სცეს ნაკისრ ვალდებულებებს და სრულად შეასრულოს 2008 წლის 12 აგვისტოს ცეცხლის შეწყვეტის შეთანხმება, გაიყვანოს თავისი სამხედრო შენაერთები საქართველოს ოკუპირებული ტერიტორიებიდან და უზრუნველყოს უსაფრთხოების საერთაშორისო მექანიზმების შექმნა აფხაზეთისა და ცხინვალის რეგიონებში.

საგარეო საქმეთა სამინისტრო მოუწოდებს საერთაშორისო თანამეგობრობას, სათანადო შეფასება მისცეს რუსეთის ფედერაციის აგრესიულ ქმედებებს და ქმედითი ზომები მიიღოს რეგიონში უსაფრთხოების ვითარების შემდგომი დამძიმების თავიდან ასაცილებლად.

22 ნოემბერს, რუსეთის ფედერაციის პრეზიდენტმა ხელი მოაწერა კანონს სოხუმის საოკუპაციო რეჟიმთან შეიარაღებული ძალების გაერთიანებული დაჯგუფების შექმნასთან დაკავშირებით დადებული ე.წ. შეთანხმების რატიფიკაციის თაობაზე.

გაერთიანებული სამხედრო დაჯგუფებები რუსეთსა ან აფხაზეთზე შეიარაღებული თავდასხმის საფრთხეზე რეაგირებისთვის შეიქმნა. რუსეთის მხრიდან დაჯგუფებაში აფხაზეთის ტერიტორიაზე მდებარე სამხედრო ბაზა შედის, აფხაზეთის მხრიდან კი საარტილერიო და საავიაციო ჯგუფები, სპეციალური დანიშნულების რაზმი და 2 მოტორიზებული ქვეითთა ბატალიონი.

აგრესიის საფრთხის შემთხვევაში ან/და ომის დროს დაჯგუფება დაექვემდებარება რუსეთის თავდაცვის სამინისტროს.