რუსეთის პრეზიდენტმა, ვლადიმერ პუტინმა ხელი მოაწერა კანონს რუსეთსა და აფხაზეთს შორის შეიარაღებული ძალების გაერთიანების თანხმობის რატიფიცირების შესახებ. ინფორმაციას ამის შესახებ RIA Novosti ავრცელებს.

რუსული სააგენტოს ინფორმაციით, თანხმობას ხელი 2015 წლის 21 ნოემბერს მოეწერა, მისი რატიფიცირება კი 2016 წლის 22 ნოემბერს მოხდა.

RIA-ს ცნობით, გაერთიანებული სამედრო დაჯგუფებები რუსეთსა ან აფხაზეთზე შეიარაღებული თავდასხმის საფრთხეზე რეაგირებისთვის შეიქმნა. რუსეთის მხრიდან დაჯგუფებაში აფხაზეთის ტერიტორიაზე მდებარე სამხედრო ბაზა შედის, აფხაზეთის მხრიდან კი საარტილერიო და საავიაციო ჯგუფები, სპეციალური დანიშნულების რაზმი და 2 მოტორიზებული ქვეითთა ბატალიონი.

აგრესიის საფრთხის შემთხვევაში ან/და ომის დროს დაჯგუფება დაექვემდებარება რუსეთის თავდაცვის სამინისტროს.

რუსეთმა ხელი მოაწერა შეთანხმებას სისხლის სამართლის საქმეებზე დახმარების შესახებაც.

შეთანხმების თანახმად, მხარეებმა ვალდებულება აიღეს გაუწიონ ერთმანეთს სამართლებრივი დახმარება გამოძიებებში, სასამართლო დავებში და სხვა საპროცესო მოქმედებებში, რაც სისხლის სამართალს ეხება.