ევროპული საქართველოს დეპუტატი, ოთო კახიძე მმართველი პარტიის თავმჯდომარეს აფრთხილებს, რომ სანქციების სიაში სენატორი ჯიმ რიში ამატებინებს გვარებს და არ დაუჯეროს თანაგუნდელებს. ოპოზიციონერი დეპუტატი ამით სენატორის განცხადებას გამოეხმაურა, რომელმაც თქვა, რომ ელოდება 8 მარტის შეთანხმების შესრულებას, პოლიტიკური პატიმრების გათავისუფლების ჩათვლით.

"ბატონო ბიძინა, ახლა კობახიძე, ნაცვლიშვილი და ხაინდრავა დაგიწყებენ, რო "შეФ, ეგ ვიღაც რიგითი სენატორია", "ცოტას იჭიჭყინებენ და გაჩუმდებიან", "საშინაო საქმეებში ჩარევაა", "ბოკერიამ მოისყიდა ტვიტერი" და ეგეთ სისულელეებს. არ დაუჯეროთ არაფერი მაგათ, თორე შარს გადაგყრიან.

სანქციების სიაში ეგ კაცი ამატებინებს გვარებს, მართლა. ძაან საშიში ვინმეა და არ უყვარს მიკიბ-მოკიბული საუბარი, მოკლედ, ყური-მური არ იცის. ეგ იდიოტები მერე გეტყვიან, გავასაჩივროთ სანქციები ამერიკის სასამართლოში, დერი პასკამ ეგრე ქნაო, სახაზინო დეპარტამენტს არ ჰქონდა თქვენი ფულის გაყინვის უფლებაო, და ქეშად რაც დაგრჩებათ გადანახული, იმას დაგახარჯინებენ. აი, დამატებით ლობისტებში რომ მილიონები გადაგაყრევინეს, ეგრე.

ჰოდა, კიდევ ერთხელ გიმეორებთ — არ დაუჯეროთ მაგათ არაფერი, სენატის საგარეო ურთიერთობათა კომიტეტის თავმჯდომარეს დაუჯერეთ პირდაპირ. ქვეყნისთვისაც ასე აჯობებს და თქვენთვისაც. გამოაშვებინეთ უგულავა, რურუა და ოქრუაშვილი, რაც მალე, მით უკეთესი. მერე ნორმალური კამპანია და თუ წააგეთ - ხელისუფლების გადაბარება ზედმეტი გაძალიანების გარეშე", — წერს ოთო კახიძე ფეისბუქის გვერდზე.

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან. მმართველი გუნდი კი ამბობს, რომ შეთანხმებაში არ ეწერა არცერთი პოლიტიკოსის გათავისუფლების საკითხი და ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

ოპოზიცია აცხადებს, რომ ამ პირობის შესრულების გარეშე საარჩევნო ცვლილებებს მხარს არ დაუჭერენ. პასუხად მმართველი გუნდი აცხადებს, რომ ოპოზიციას ცვლილებების ჩაგდება სურს.

ამავე თემაზე:

8 მარტის შეთანხმებასთან დაკავშირებით დიპლომატებმა განცხადება განცხადება გაავრცელეს, სადაც ისინი ამბობენ, რომ შეთანხმება შედგება ორი ნაწილისგან: ერთი ფოკუსირებულია სააჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, რაც სასამართლო სისტემაში პოლიტიკურ ჩარევას ჰგავს.

8 მარტს ოპოზიციასა და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.

"ჩვენ ვეთანხმებით საქართველოს მართლმსაჯულების სისტემაში უმაღლესი სტანდარტების დაცვისა და მათი დახვეწისკენ სწრაფვის მნიშვნელობას. მიუხედავად განსხვავებული აზრისა, ყველანი ვთანხმდებით, რომ აუცილებელია რეაგირება ქმედებებზე, რომლებიც შესაძლოა, აღქმულ იქნეს, როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იქნეს აცილებული.

მივესალმებით პრეზიდენტის წინადადებას, მისი საკონსტიტუციო უფლებამოსილების ფარგლებში, თავისუფალი, სამართლიანი და გამჭვირვალე საარჩევნო პროცესის ხელშეწყობასთან დაკავშირებით", — წერია განცხადებაში.