შერიგებისა და სამოქალაქო თანასწორობის საკითხებში ყოფილი მინისტრის, პაატა ზაქარეიშვილის განცხადებით, იმის ნაცვლად, რომ იმსჯელონ რაში სჭირდება უკრაინის პრეზიდენტს ყოფილი პრეზიდენტი, მიხეილ სააკაშვილი, მსჯელობა "უდღეურ ხელისუფლებაზეა". ამ თემაზე ყოფილმა მინისტრმა TV პირველის ეთერში ისაუბრა.

"ძალიან უსუსურები გამოჩნდნენ, იმის ნაცვლად, რომ გველაპარაკა რამდენად სჭირდება და რა პრობლემები აქვს ზელენსკის, რომ ეს ტაკიმასხარა სააკაშვილი სჭირდება, ამის ნაცვლად გვიწევს ლაპარაკი ჩვენს უდღეურ ხელისუფლებაზე, რაზეც ძალიან გული მწყდება. უკრაინა ჩვენი კონცეპტუალური მოკავშირეა", — თქვა პაატა ზაქარეიშვილმა.

ყოფილი მინისტრი ფიქრობს, რომ უკრაინის პრეზიდენტს მიხეილ სააკაშვილი ყურადღების გადასატანად სჭირდება. მისი თქმით, ხელისუფლების რეაქცია არარეალური და არაადეკვატური იყო, რითიც სააკაშვილის პოტენციური წარმატება აღიარეს.

სააკაშვილის ვიცე-პრემიერად დანიშვნის საკითხი, შესაძლოა, საქართველოსა და უკრაინას შორის დიპლომატიური ურთიერთობის შეწყვეტის მიზეზი გახდეს. ქართული ოცნების წარმომადგენლები ზელენსკის გადაწყვეტილებას კატეგორიულად მიუღებელს უწოდებენ.

შეგახსენებთ, რომ ექსპრეზიდენტის, პეტრო პოროშენკოს დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პოროშენკოს ბრძანებით ის რეადმისიით პოლონეთში დააბრუნეს.

საპრეზიდენტო არჩევნებში გამარჯვების შემდეგ ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ოდესის ყოფილი გუბერნატორი ქვეყანაში დაბრუნდა. რამდენიმე დღის წინ კი ცნობილი გახდა, რომ ზელენსკიმ მას ვიცე-პრემიერის პოსტი შესთავაზა.

ამავე თემაზე: