ქართული ოცნების დეპუტატი, რატი იონათამიშვილი მიხეილ სააკაშვილის უკრაინის ვიცე-პრემიერობის შემთხვევაში, უკრაინასთან დიპლომატიური ურთიერთობის გადახედვას არ გამორიცხავს. ეს განაცხადი დეპუტატმა ტვ იმედის ეთერში 22 აპრილს გააჟღერა:

"თუ მართლა დაინიშნა მიხეილ სააკაშვილი უკრაინაში ვიცე-პრემიერად, ანუ ადამიანი, რომელიც არის ქართული მართლმსაჯულების მიერ ცნობილი დამნაშავედ და დღეს არის ძებნილი, ეს ცხადია, ძალიან დაამძიმებს საქართველოსა და უკრაინის ურთიერთობებს. მე არ გამოვრიცხავ, რომ დღის წესრიგში დადგეს დიპლომატიური ურთიერთობის გადახედვის საკითხი".

საქართველოს ყოფილი პრეზიდენტის და ოდესის ყოფილი გუბერნატორის, მიხეილ სააკაშვილის განცხადებით უკრაინის პრეზიდენტმა, ვოლოდიმირ ზელენსკიმ მთავრობაში რეფორმების საკითხზე ვიცე-პრემიერობა შესთავაზა. ამის შესახებ სააკაშვილმა ფეისბუქზე დაპოსტა.

როგორც სააკაშვილი ამბობს, ის პრემიერმინისტრ დენის შმიგალსაც შეხვდა. მისივე თქმით, უკრაინის უმაღლეს რადას ის თავის ხედვებს მთავრობის გეგმის ფარგლებში წარუდგენს. ფრაქციის დეპუტატები მიხეილ სააკაშვილის რადის რიგგარეშე სხდომამდე შეხვდებიან, რომელიც 24 აპრილსაა ჩანიშნული.