საქართველოს ექსპრეზიდენტი მიხეილ სააკაშვილი, რომელიც უკრაინის ვიცე-პრემიერის პოსტზეა წარდგენილი, აცხადებს, რომ პრეზიდენტ ვოლოდიმირ ზელენსკისთან კონფლიქტის მოლოდინი არ აქვს და მათი თანამშრომლობა ისე არ დასრულდება, როგორც ექსპრეზიდენტის, პეტრო პოროშენკოს შემთხვევაში. არგუმენტად სააკაშვილი იმას ასახელებს, რომ ზელენსკი ქურდი არ არის.

"სამწუხაროდ, პოროშენკო მიდრეკილი იყო ამისკენ. მას უყვარდა ფული. ამის გამო სერიოზული პრობლემები მქონდა მასთან.

ზელენსკის მსგავსი პრობლემები არ ექნება. მისი გაკრიტიკება შეიძლება რეფორმების სისწრაფის ან არასწორი გადაწყვეტიელბების გამო, მაგრამ ეს კონფლიქტის მიზეზი ვერ გახდება", — განუცხადა მან DW-ს ინტერვიუში.

კითხვაზე, რატომ დატოვა სააკაშვილმა ოდესის გუბერნატორის თანამდებობა მაშინ და რატომ სურს უკრაინის ხელისუფლებაში დაბრუნება ახლა ის პასუხობს, რომ პოროშენკოს დროს კორუფციის აღოფხვრა შეუძლებელი იყო, რადგან თავად ექსპრეზიდენტიც ამის ნაწილი იყო. მისი თქმით, ახლა ზელენსკის ცვლილებების გატარება სურს, მას კი აქვს გამოცდილება, რომელიც უკრაინას წაადგება.

სააკაშვილის თქმით, ვიცე-პრემიერობა მას პირადად პრეზიდენტმა ზელენსკიმ შესთავაზა, შემდეგ კი ამ საკითხს ქვეყნის პრემიერთან, დენის შმიგალთან განიხილავდა. მისი დანიშვნის საკითხი დღეს უნდა განეხილათ, თუმცა პარლამენტში კენჭისყრა აპრილის ბოლომდე გადაიდო.

სააკაშვილის ვიცე-პრემიერად დანიშვნის საკითხი, შესაძლოა, საქართველოსა და უკრაინას შორის დიპლომატიური ურთიერთობის შეწყვეტის მიზეზი გახდეს. ქართული ოცნების წარმომადგენლები ზელენსკის გადაწყვეტილებას კატეგორიულად მიუღებელს უწოდებენ.

შეგახსენებთ, რომ პოროშენკო და საააკშვილი თანამებრძოლები იყვნენ და მისი პრეზიდენტობის დროს სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პოროშენკოს ბრძანებით ის რეადმისიით პოლონეთში დააბრუნეს.

საპრეზიდენტო არჩევნებში გამარჯვების შემდეგ ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ოდესის ყოფილი გუბერნატორი ქვეყანაში დაბრუნდა.