ჩინეთის მთავრობამ მკაფიოდ გამოთქვა სურვილი, რომ ადამიანების მიერ ძაღლების საკვებად გამოყენების პრაქტიკა დასრულდეს.

ამასთან დაკავშირებით განცხადება ჩინეთის სოფლის მეურნეობის სამინისტრომ გაავრცელა, სადაც აღნიშნულია, რომ "კაცობრიობის განვითარებასთან" ერთად ცხოველების კეთილდღეობის მნიშვნელობა და ცხოველებიდან ადამიანებზე გადამდები დაავადებების პრევენცია იზრდება.

როგორც The Guardian წერს, ამავე განცხადებაში ნახსენებია, რომ ძაღლი "ადამიანის განსაკუთრებული თანამგზავრია" და მას საერთაშორისო მასშტაბით საკვებ ხორცად არ იყენებენ, შესაბამისად ეს სახეობა იმ სიიდან უნდა ამოიღონ, რომელიც ცხოველთა ფერმებს უფლებას აძლევდა ძაღლები შემდგომში საკვებად გამოსაყენებლად გაეზარდათ.

თებერვალში ჩინეთის ერთ-ერთ დიდ ქალაქში, შენჯენში კატებისა და ძაღლების საკვებად გამოყენება აკრძალეს, რამაც ცხოველების უფლებადამცველებს იმედი მისცა, რომ იმავეს ქვეყნის დანარჩენ ნაწილშიც გაიმეორებდნენ. მთავრობის ახალი განცხადება კი სწორედ ამას მოასწავებს.

"ეს სამინისტროსგან პირველი გზავნილია, რომ ძაღლები საკვებისთვის გამოსაყენებელი ცხოველები არ არიან. ეს ადგილობრივ ხელისუფლებას შესაძლებლობას აძლევს, რომ შენჯენის მაგალითს თამამად მიჰბაძონ", — ამბობს ცხოველთა მიმართ სასტიკი მოპყრობის პრევენციის საერთაშორისო ორგანიზაციის ხელმძღვანელი, პოლ ლითლფეირი.

ცხოველთა დაცვის ერთ-ერთი ყველაზე გავლენიანი საერთაშორისო ორგანიზაციის, ჰუმანური საზოგადოების (HSI) წარმომადგენლის, ვენდი ჰიგინსის განცხადებით, სოფლის მეურნეობის სამინისტროს მოწოდებამ, შესაძლოა, ჩინეთში ცხოველების უფლებების მხრივ მდგომარეობა მნიშვნელოვნად შეცვალოს:

"ჩინეთის მოსახლეობის უმეტესობა ძაღლისა და კატის ხორცს არ ჭამს, შესაბამისად, მათაც სურთ, რომ ძვირფასი ოთხფეხა მეგობრების მოპარვა და შემდეგ ხორცის ბაზარზე გაყიდვა დასრულდეს, რითიც სარგებელს მხოლოდ მოსახლეობის მცირე ნაწილი იღებს".

ჰუმანური საზოგადოების საერთაშორისო ორგანიზაციის მონაცემებით, ჩინეთში 10-დან 20 მილიონამდე ძაღლს კლავენ საკვებად გამოყენებისთვის და მათი უმეტესობა პატრონებისგან მოპარულია და არა სპეციალურ ფერმებში გაზრდილი.

ჩინეთში ამ საკითხებზე მსჯელობა მას შემდეგ გააქტიურდა, რაც 2020 წლის იანვარში კორონავირუსის პანდემიამ იფეთქა და ამის გამომწვევ მთავარ მიზეზად გარეული ცხოველების ხორცის ბაზრობა ითვლება.