ბოლო მონაცემების მიხედვით, Tesla-ს აქციების ფასი მზარდ ტენდენციას აჩვენებს. თუმცა, ივნისის დასაწყისში აშშ-ის პრეზიდენტ, დონალდ ტრამპსა და Tesla-ს აღმასრულებელ დირექტორს, ილონ მასკს შორის დაპირისპირებას კომპანიის აქციების ღირებულების ვარდნა მოჰყვა. როგორც ცნობილია, მასკი საარჩევნო კამპანიისა და მომდევნო პერიოდში ტრამპის ძლიერ მხარდამჭერად მიიჩნეოდა.

ყველაფერი იმით დაიწყო, რომ მასკი ტრამპის ეგრეთ წოდებულ "დიდ და მშვენიერ" გადასახადებისა და ხარჯვის გეგმას საჯაროდ შეეწინააღმდეგა. ამის საპირისპიროდ კი, ტრამპმა ის საკუთარ ბიზნესთან დაკავშირებული ინტერესების გატარებაში დაადანაშაულა. ტრამპმა შაბათს ისიც თქვა, რომ მისი ურთიერთობა მასკთან დასრულებულია. მასკმა კი სოციალურ ქსელ X-ზე ახალი პოლიტიკური პარტიის შექმნის შესახებ იდეა წამოაყენა.

აშშ-ის პრეზიდენტსა და Tesla-ს აღმასრულებელ დირექტორს შორის დაძაბულობამ Tesla-ს აქციების მნიშვნელოვანი ვარდნა გამოიწვია — კომპანიის ფასიანი ქაღალდები ივნისის პირველ კვირაში დაახლოებით 15%-ით დაეცა.

არსებული მდგომარეობით, მასკსა და ტრამპს შორის დაძაბულობა შემცირებულია. ამაზე ისიც მიანიშნებს, რომ Tesla-ს დირექტორმა რამდენიმე კრიტიკული პოსტი საკუთარ სოციალურ ქსელში უკვე წაშალა. ექსპერტების თქმით, ამჟამად Tesla-ს აქციების აღმავალი ტენდენცია შესაძლებელია უკავშირდებოდეს, როგორც ზოგადი დაძაბულობის მოხსნას, ისე რობოტექსის სერვისის ამოქმედებას ტეხასში, რაც ინვესტორებისთვის დამატებით დადებით ფაქტორს წარმოადგენს.

აღსანიშნავია, რომ ზოგიერთი ანალიტიკოსი კომპანიის მომავლის პერსპექტივებს ჯერ კიდევ კრიტიკულად უყურებს. ეს უმთავრესად მასკისა და ტრამპის ურთიერთობის კომპანიის ეკონომიკურ მაჩვენებლებზე გავლენასთან არის დაკავშირებული. Argus Research-მა და Baird-მა განაცხადეს, რომ Tesla-ს აქციები ჯერ კიდევ რჩება მათ რჩეულ ფასიან ქაღალდებს შორის, თუმცა ეგრეთ წოდებულ შენახვის (Hold) რეიტინგს ამცირებენ.

არსებული მდგომარეობით, Tesla-ს (TSLA) ერთი აქციის ღირებულება 340.47 დოლარია. მისი აქციების ფასები წლის დასაწყისთან შედარებით შემცირებულია 15.69%-ით, ხოლო ბოლო ერთი წლის ჭრილში გაზრდილია 84%-ით. ამჟამად Tesla-ს საბაზრო კაპიტალიზაცია 1.097 ტრილიონი დოლარია და ის მსოფლიოს ერთ-ერთ უმსხვილეს კომპანიად არის მიჩნეული.

გახსენი საინვესტიციო ანგარიში თიბისის მობაილბანკში და შეიძინე ამერიკული აქციები და ფონდები საკომისიოს გარეშე. გაითვალისწინე, რომ ეს არ არის ფინანსური რჩევა.