საპატრიარქოს პრესსამსახურის ხელმძღვანელი მამა ანდრია ჯაღმაიძე ამბობს, რომ კომენდანტის საათის დროს მორწმუნე უნდა იყოს სახლში. თუმცა, მისივე თქმით, არ მიუღიათ გადაწყვეტილება რა მოხდება აღდგომაზე, რადგან სიტუაციის განმუხტვას ელოდებიან. ამის შესახებ მან გადაცემა პოლიტ-ქალაქში ისაუბრა.

"ჯერ არა გვქვს მიღებული გადაწყვეტილება, როგორ შევძლებთ რომ მსახურება სრულფასოვნად, მრევლთან ერთად აღესრულოს და იმავდროულად არ დაირღვეს კომენდანტის საათი.

მორწმუნემ მხედველობაში უნდა მიიღოს ის რეკომენდაციები, რაც ხელისუფელბისგან არის, რაც ჯანდაცვის მესვეურთაგან მოდის, მითუმეტეს ვხედავთ რომ ეს ხალხი ნდობას იმსახურებს, ეფექტურია მათი მუშაობა", — განაცხადა მან.

მანვე აღნიშნა, რომ ჯერ ხელისუფლებასთან არ უსაუბრიათ ეკლესიისთვის გამონაკლისების დაშვებაზე, რადგან ელოდებიან, როგორ განვითარდება მოვლენები.

ბოლო რამდენიმე დღეა საკარანტინო შეზღუდვაზე ეკლესიის პოზიცია კრიტიკისა და დავის საგანი გახდა. მაშინ, როცა აკრძალულია სამ კაცზე მეტის შეკრება, ეკლესიაში წირვა-ლოცვა ისევ ტარდება და მართალია დისტანციის დაცვით, მაგრამ ათეულობით ადამიანი იკრიბება.

პირველ აპრილს პატრიარქმა ილია მეორემ გაავრცელა მიმართა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

სამი რეკომენდაცია:

  • კომენდანტის საათის გათვალისწინებით, ხვალიდან ლოცვები დაიწყოს შუა დღის 16:00 საათზე, ხოლო ყოველ დღე ეკლესია დაიკეტოს საღამოს 8 საათისთვის;
  • აუცილებელია ტაძრის ეზოში 1,5მ-ის დაშორებით დროულად გაკეთდეს ნიშნულები;
  • ყოველდღიურად ხშირად უნდა გაიწმინდოს ხატები და სიწმინდეები (სპირტისა და ვარდის წყლით), ასევე, დამუშავდეს იატაკი და ეკლესიაში მუდმივი მეთვალყურეობისთვის გამოიყოს პასუხისმგებელი პირები.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 174 შემთხვევაა დაფიქსირებული. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: