დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

დაავადებათა კონტროლის ეროვნული ცენტრის დირექტორმა TV პირველის ეთერში კორონავირუსის დიაგნოსტირების მეთოდები განმარტა.

ამირან გამყრელიძის თქმით, ლაბორატორიული დიაგნოსტირების სამი მეთოდი არსებობს:

  • მოლეკულური დიაგნოსტიკა, იგივე PCR დიაგნოსტიკა;
  • ანტიგენზე დამყარებული სწრაფი ტესტი;
  • ანტისხეულებზე დამყარებული სწრაფი ტესტი.

საქართველო ამ ეტაპზე იყენებს PCR ტექნოლოგიას, რომელსაც, ამირან გამყრელიძის თქმით, ოქროს სტანდარტსაც ეძახიან.

"ოქროს სტანდარტს როცა ვუწოდებთ, ეს ნიშნავს იმას, რომ მისი სპეციფიურობა და მისი დიაგნოსტიკური ღირებულება არის ძალიან მაღალი. ანუ ამ ტესტით თქვენ დიაგნოზს სვამთ უკვე დაავადების დასაწყისის პირველივე დღეს ან ზოგჯერ ინკუბაციური პერიოდის ბოლოსაც კი; ასე ვთქვათ, უსიმპტომო სტადიაშიც კი შეიძლება ნახოთ ცხვირ-ხახის ნაცხში ვირუსი", — ამბობს ამირან გამყრელიძე.

ამ ტიპის ტესტირება თავდაპირველად მხოლოდ ლუგარის ლაბორატორიაში იყო ხელმისაწვდომი, ახლა კი არის ბათუმში, ქუთაისში, თბილისის ინფექციურ საავადმყოფოში და როგორც გამყრელიძე აღნიშნავს, ორშაბათიდან იქნება ერთ-ერთ კერძო ლაბორატორიაში. ამასთან, კიდევ შვიდ ლაბორატორიას მიეცა უფლება, რომ შეიძინონ და კერძოდ გააკეთონ ტესტირება.

მისივე თქმით, თებერვალ-მარტში ქვეყანაში ჯამში 2 000 ტესტირება ჩატარდა, დადასტურებული შემთხვევა კი დაახლოებით 4%-ია. გამყრელიძე ამბობს, რომ არავის, ვისაც ტესტის გაკეთება სჭირდება, ამაზე პრობლემა არ ექმნება და ამას ადასტურებს ეს მაჩვენებელიც.

ამ მეთოდს ყველაზე მეტი დროს სჭირდება — 3-4 საათი. თუმცა, იმ ტექნიკით, რომელიც ჩინეთმა საქართველოს აჩუქა, შესაძლებელია პასუხის 1.5 საათში დადგენა. გარდა ამისა, არის კიდევ ახალი შესაძლებლობა, რომელიც საქართველოს ჯერ არ აქვს და გამყრელიძის თქმით, ცდილობს მოიპოვოს, რომელიც პასუხს 45 წუთში იძლევა. დაავადებათა კონტროლის ეროვნული ცენტრის დირექტორი ამბობს, რომ აქ გამოიყენება იგივე აპარატურა, რაც საქართველოს უკვე რეგიონებშიც აქვს, რადგან C ჰეპატიტის და ტუბერკულოზის გამოსავლენად იყენებდა. გამყრელიძის თქმით, იმ შემთხვევაში, თუ ეს ტესტები ქვეყანამ შეიძინა, PCR ტექნოლოგიით კორონავირუსზე შემოწმება შესაძლებელი იქნება ყველა რეგიონში.

რაც შეეხება სწრაფ ტესტებს, ანტიგენზე დამყარებულ მეთოდის დროს ცხირის ნაცხი მოწმდება და პასუხი არის 15 წუთში. ამ მეთოდს უარყოფითი მხარეც აქვს — მისი სიზუსტე 80-85%-ს შორის.

ამირან გამყრელიძე განმარტავს, რომ სწორედ ესაა ის ტესტი, რომელსაც ბევრ ქვეყანაში მასობრივი ტესტირებისთვის იყენებენ.

ანტისხეულებზე დამყარებული სწრაფი ტესტები კი სისხლს ამოწმებს. როგორც ამირან გამყრელიძე განმარტავს, ტესტი სისხლში ეძებს ორი ტიპის ანტისხეულებს — იმუნოგლობულინი M და იმუნოგლობულინი G.

"თუ გაქვს იმუნოგლობულინი M, ეს იმას ნიშნავს, რომ ამ დაავადების მწვავე ფაზაში იმყოფები, თუ არის G, ეს ნიშნავს, რომ გადატანილი გაქვთ რაღაც დროს ისე, რომ ვერც გაიგეთ", — ამბობს გამყრელიძე.

თუმცა, მისი განმარტებით, ამ ტესტის უარყოფითი არის ის, რომ იმუნოგლობულინი M სისხლში ჩნდება დაავადებიდან მე-5, მე-7 დღეს, ანუ ინფექციის დადგენა საწყის ეტაპზე ამით ვერ მოხდება.

დაავადებათა კონტროლის ეროვნული ცენტრის დირექტორი ამბობს, რომ ხშირად, ორივე სწრაფი ტესტი საჭიროებს გადამოწმებას ე.წ. ოქროს სტანდარტით, ამიტომ აუცილებელია ქვეყანას ჰქონდეს PCR ტექნოლოგია.

"ჩემი მიდგომაა, რომ ქვეყანას უნდა ჰქონდეს სამივე, მაგრამ აუცილებელია პირველი", — ამბობს გამყრელიძე.

მისივე ინფორმაციით, ის ტესტები, რომელიც საქართველოს ჩინური კომპანიისგან უნდა შეესყიდა და რომელიც უხარისხო გამოდგა, ანტიგენზე დამყარებულია. გამყრელიძე ასევე ამბობს, რომ ამ ტიპის ტესტებს ძირითადად ჩინეთი და კორეა აწარმოებენ და კორეას 70-ქვეყნიანი რიგი აქვს. დაავადებათა კონტროლის ეროვნული ცენტრის დირექტორის ინფორმაციით, მოლაპარაკებები კორეასთანაც მიმდინარეობს.

ამ დროისთვის საქართველოში კორონავირუსის 90 დადასტურებული შემთხვევაა. მათგან 16 უკვე გამოჯანმრთელდა. კარანტინის რეჟიმში იმყოფება 4695 ადამიანი, ხოლო სტაციონარში მეთვალყურეობის ქვეშ — 231.

"ქვეყანაში არ ყოფილა ტესტირების დეფიციტი ოქროს სტანდარტით. სწრაფი ტესტი სასურველია, რომ იყოს და უნდა იყოს, მაგრამ ეს პანაცეა არ არის", — აღნიშნა გამყრელიძემ.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: