"გორჩაკოვის ფონდი" საქართველოს მოქალაქეებს რუსეთში უფასო სტაჟირების პროგრამებს სთავაზობს სამი მიმართულებით — საერთაშორისო ურთიერთობებში, ბირთვულ ტექნოლოგიებსა და მედიცინაში. ინფორმაციას შვეიცარიის საელჩოში რუსეთის ინტერესების სექცია სოციალურ ქსელში ავრცელებს.

"ახალგაზრდა პროფესიონალებს უნიკალურ შესაძლებლობას აძლევს, მიიღონ პრაქტიკული გამოცდილება არჩეულ სფეროში და დაამყარონ პროფესიული კონტაქტები. არ გაუშვათ ხელიდან შანსი, მიიღოთ მონაწილეობა კონკურსში და წვლილი შეიტანოთ საერთაშორისო დიალოგის განვითარებაში!", — ნათქვამია გავრცელებულ ინფორმაციაში.

სტაჟირების პროგრამებს InteRussia ახორციელებს და მიმდინარე წლის ოქტომბერ-ნოემბერ-დეკემბერშია დაგეგმილი.

შვეიცარიის საელჩოში რუსეთის ინტერესების სექციის ფეისბუქ-გვერდზე გავრცელებული ინფორმაციით, მედიცინის მიმართულებით სტაჟირება მოსკოვში 12-26 ოქტომბერს ჩატარდება.

გავრცელებულ განცხადებაში ვკითხულობთ, რომ პროგრამა მოიცავს რუსეთის წამყვან ჯანდაცვის დაწესებულებებში, უახლესი მაღალტექნოლოგიური მეთოდების გამოყენებით, მკურნალობისა და დიაგნოსტიკური პროცესის ორგანიზების მონაწილეებისთვის გაცნობას.

ასევე მოსკოვში (20 ოქტომბერი-30 ნოემბერი) ჩატარდება InteRussia-ს სტაჟირების პროგრამა საერთაშორისო ურთიერთობებში.

"InteRussia-ს სტაჟირების პროგრამა ახალგაზრდა უცხოელ სპეციალისტებს საერთაშორისო ურთიერთობების ისტორიისა და თეორიის, პოლიტოლოგიისა და უცხოური რეგიონული კვლევების სფეროებში აძლევს შესაძლებლობას გაეცნონ რუსეთის სამეცნიერო საზოგადოების ცხოვრებას, ეწვიონ სამთავრობო უწყებებს, მონაწილეობა მიიღონ ექსპერტთა სესიებში უნივერსიტეტებში, ანალიტიკურ ცენტრებსა და საზოგადოებრივ ორგანიზაციებში და გაცვალონ გამოცდილება სხვადასხვა ქვეყნის კოლეგებთან", — ნათქვამია განცხადებაში.

17 ნოემბრიდან 15 დეკემბრამდე, სანქტ-პეტერბურგსა და ობნინსკში იგეგმება InteRussia-ს სტაჟირების პროგრამა ბირთვულ ტექნოლოგიებში.

"InteRussia-ს სტაჟირების პროგრამა, რომელსაც მხარს უჭერს "როსატომი", მიზნად ისახავს რუსეთის ბირთვული ტექნოლოგიების ძირითადი ტიპებისა და მათი გამოყენების სხვადასხვა ინდუსტრიაში, როგორიცაა ენერგიის წარმოება, მედიცინა და სოფლის მეურნეობა, მონაწილეებისთვის გაცნობას.

ორგანიზატორები ფარავენ მონაწილეთა მგზავრობისა და განთავსების ყველა ხარჯს, ასევე გარანტიას იძლევიან სტიპენდიის გადახდას პროგრამაში მონაწილეობის მთელი პერიოდის განმავლობაში", — ნათქვამია გავრცელებულ ინფორმაციაში.