პირბადეებითა და ნიღბებით დაფარულმა ქურდების ჯგუფმა ამ კვირაში ლოს-ანჯელესის რაიონის ერთ-ერთი მაღაზიიდან დაახლოებით $7,000-ის ღირებულების ლაბუბუს სათამაშოები მოიპარა, — აცხადებს ლოს-ანჯელესის პოლიცია.

ინციდენტი ოთხშაბათს დილით მოხდა ლა პუენტეში, ქალაქში, რომელიც ლოს-ანჯელესიდან დაახლოებით 29 კილომეტრის დაშორებით, აღმოსავლეთით მდებარეობს, — აცხადებს ლოს-ანჯელესის ოლქის შერიფის დეპარტამენტი. უწყების თქმით, ეჭვმიტანილებმა დანაშაულის ჩადენისას მოპარული Toyota Tacoma გამოიყენეს, რომელიც მალევე იპოვეს. გამოძიება გრძელდება და დამატებითი ინფორმაცია პოლიციას ამ ეტაპზე არ აქვს.

ლაბუბუ ჰონგ-კონგში დაბადებული არტისტის, კასინგ ლუნგის შექმნილი, პატარა, კბილებალესილი მონსტრების სათამაშოების სერიებიდან ერთ-ერთი თოჯინაა, რომელიც ბოლო წლის განმავლობაში კოლექციონერებში ძალიან პოპულარული გახდა.

სათამაშოების მაღაზიამ One Stop Shop სოციალურ ქსელ Instagram-ზე დაწერა, რომ ქურდებმა ლაბუბუების მთლიანი მარაგი წაიღეს და მაღაზია დააზიანეს. მაღაზიამ ასევე გამოაქვეყნა სამეთვალყურეო კამერის ჩანაწერი, სადაც ჩანს ჰუდებითა და სახის ნიღბებით ჩაცმული ადამიანების ჯგუფი, რომლებიც კარს ამტვრევენ. კადრებში ჩანს, როგორ ათვალიერებენ ისინი ნივთებს და ყუთებით გამოაქვთ.

"ჩვენ ჯერ კიდევ შოკში ვართ," — წერია მაღაზიის პოსტში, სადაც საზოგადოებას სთხოვენ დაეხმარონ ქურდების პოვნაში.