ოკუპირებული აფხაზეთის საგარეო საქმეთა სამინისტრო თეთრი სახლის მიერ გავრცელებულ ინფორმაციას ეხმაურება, რომლის თანახმადაც, აშშ-ს ვიცე-პრეზიდენტმა, ჯო ბაიდენმა გიორგი კვირიკაშვილთან საუბრისას რუსეთ-აფხაზეთის გაერთიანებული სამხედრო დაჯგუფების შექმნის რატიფიცირება დაგმო.

აფხაზეთის დე-ფაქტო საგარეო უწყება ამბობს, რომ დასავლეთის ლიდერების მიერ რეგულარულად "საქართველოს ტერიტორიულ მთლიანობასა" და "საერთაშორისოდ აღიარებულ საზღვრებზე" საუბარი იმ რეალობას ვერ შეცვლის, რაც 1993 წელს მივიღეთ, როდესაც აფხაზმა ხალხმა ომში გაიმარჯვა და 1999 წელს დამოუკიდებლობა გამოაცხადა:

"2008 წელს რუსეთის ფედერაციამ, საერთაშორისო სამართალთან სრულ შესაბამისობაში, აფხაზეთის სუვერენიტეტი აღიარა, რაც აფხაზეთისთვის წინ გადადგმული ნაბიჯი აღმოჩნდა თავისუფალი თვითგამორკვევის პროცესში.

აფხაზეთსა და რუსეთს შორის მეგობრული ურთიერთობები, რომელიც მოლაპარაკებას ეფუძნება, ინტენსიურად ვითარდება, მათ შორის სამხედრო სფეროშიც. 2015 წლის 21 ნოემბერს მიღწეული შეთანხმება გაერთიანებული სამხედრო დაჯგუფების შექმნასთან დაკავშირებით, რომელიც თავდაცვისა და უსაფრთხოების უზრუნველყოფას ემსახურება, ორი მხარის უერთიერდაინტერესების შედეგია და მთლიანად პასუხობს, როგორც აფხაზეთის, ისე რუსეთის ინტერესებს.

აღნიშნულის შესახებ გადაწყვეტილება და რატიფიცირება არის ორი მხარის უმაღლესი ორგანოების პრეროგატივა და არ საჭიროებს რომელიმე ქვეყნის, მათ შორის აშშ-ს მიერ დამოწმებას".