თბილისის საქალაქო სასამართლოს განცხადებით, მიკროსაფინანსო ორგანიზაციებმა გაზარდეს სასამართლოსადმი მიმართვიანობა მაშინ, როცა არაერთგზის გაჟღერდა თხოვნა და მოწოდება, რომ მოქალაქეებმა და მათმა წარმომადგენლებმა სასამართლოში ვიზიტები შეზღუდონ. მათივე განცხადებით, მიკროსაფინანსო ორგანიზაციების სარჩელების გაზრდა დროში ემთხვევა იმ ფაქტსაც, რომ იუსტიციის საბჭოს რეკომენდაციის საფუძველზე ელექტრონული სერვისით სარგებლობა გახდა უფასო.

სასამართლოში აღნიშნავენ, რომ დისტანციური გრაფიკით შრომის რეჟიმზე გადავიდნენ, თუმცა ამ ფონზეც კი მიკროსაფინანსოებმა არასამუშაო დღეებში მიმართვიანობა გაზარდეს. სასამართლო იმედს იტოვებს, რომ საფინანსო ორგანიზაციები გამოიჩენენ მაღალ სამოქალაქო პასუხისმგებლობას და უფასო დისტანციური სერვისებით ბოროტად არ ისარგებლებენ.

10 მარტს იუსტიციის უმაღლესმა საბჭომ საერთო სასამართლოების ვიზიტორებს მოუწოდა, რომ გადაუდებელი აუცილებლობის არარსებობის შემთხვევაში თავი შეიკავონ სასამართლოში მისვლისგან.

თბილისის საქალაქო სასამართლოში აცხადებდნენ, რომ მათ ყოველდღიურად საშუალოდ სამი ათასამდე მოქალაქე სტუმრობს. მათივე თქმით, მიუხედავად იმისა, რომ არაერთხელ ჩატარდა სადეზინფექციო სამუშაოები, ვიზიტორთა სიმრავლის გათვალისწინებით, რისკები კორონავირუსის გავრცელებასთან მიმართებით პოტენციურად მზარდია. ამიტომ მათ თხოვნით მიმართეს საზოგადოებას, გამოიჩინონ სამოქალაქო პასუხისმგებლობა და შეძლებისდაგვარად შეამცირონ ვიზიტები.