190-მდე ექიმი ხელისუფლებას ერთობლივი განცხადებით მიმართავს და მოუწოდებს, უზრუნველყონ ღირსეული და ეფექტიანი კომუნიკაცია იმ ადამიანებთან, რომლებიც დიუშენის კუნთივან დისტროფიაას ებრძვიან. სამედიცინო სფეროს წარმომადგენლები ხაზს უსვამენ, რომ დიუშენის კუნთოვანი დისტროფია დროულ დიაგნოსტიკას, მულტიდისციპლინურ მეთვალყურეობასა და შესაბამის მკურნალობაზე ხელმისაწვდომობას საჭიროებს.

ექიმები ყურადღებას ამახვილებენ იმ მძიმე რეალობაზე, რომელშიც პაციენტების ოჯახებს უწევთ ყოფნა. მათი შეფასებით, ის ფაქტი, რომ მშობლებს სასიცოცხლო მედიკამენტების მოთხოვნა ქუჩაში უწევთ, ქვეყნისთვის ჰუმანური პრობლემაა.

"ჩვენ, ექიმები, გამოვხატავთ ღრმა შეშფოთებას საქართველოში იშვიათი დაავადებების, მათ შორის დიუშენის კუნთოვანი დისტროფიის მქონე პაციენტების მდგომარეობის გამო. აღნიშნული დაავადება პროგრესირებადი და სიცოცხლის შემზღუდველია. მისი მართვა თანამედროვე მედიცინაში მოითხოვს დროულ დიაგნოსტიკას, მულტიდისციპლინურ მეთვალყურეობასა და შესაბამის მკურნალობაზე ხელმისაწვდომობას.

დღეს საქართველოში პაციენტები და მათი ოჯახები ხშირად რჩებიან სისტემური მხარდაჭერის გარეშე და იძულებულნი არიან, სიცოცხლისთვის აუცილებელი მედიკამენტებისა და სერვისების მოთხოვნით ქუჩაში იბრძოლონ. რაც წარმოადგენს არა მხოლოდ ჯანდაცვის, არამედ ჰუმანურ და მორალურ პრობლემას.

პაციენტებს და მათ ოჯახებს ვუცხადებთ სოლიდარობას და მოვუწოდებთ სახელმწიფოს: უზრუნველყოს პაციენტებთან და მათ ოჯახებთან ღირსეული და ეფექტური კომუნიკაცია; შეიმუშაოს იშვიათი დაავადებების მართვის მკაფიო და სამართლიანი პოლიტიკა; და დროულად მოახდინოს ადეკვატური რეაგირება პაციენტების საჭიროებებზე, რათა არც ერთი ბავშვი და ოჯახი არ დარჩეს მარტო სიცოცხლისთვის ბრძოლაში", — წერია ექიმების განცხადებაში.

ამ დროისთვის განცხადებას ხელს 190-მდე ექიმი აწერს, თუმცა ხელმომწერთა რაოდენობა იზრდება.

შეგახსენებთ, სამ კვირაზე მეტია დიუშენის დისტროფიით დაავადებული ბავშვების მშობლები მთავრობის კანცელარიასთან ღამეს ათენებენ. მშობლების მოთხოვნაა, მთავრობამ უზრუნველყოს სიცოცხლისთვის აუცილებელი მედიკამენტის ჩამოტანა და მათ ირაკლი კობახიძე შეხვდეს.