პარტია ფედერალისტები 2021 წელს მოკლული 22 წლის ნიკო კვარაცხელიას დედის, იზა ომაძის განცხადებას ეხმაურება, სადაც ის ფედერალისტებს იმ ვიდეოს სოციალური ქსელიდან აღებას სთხოვს, სადაც მისი შვილის, ნიკო კვარაცხელიას მკვლელობაა ნახსენები.

პარტია აცხადებს, რომ "ღრმა პატივისცემას და თანაგრძნობას გამოხატავენ ქალბატონი იზას მიმართ" და დასძენენ, რომ ნიკო კვარაცხელიას მკვლელობა "აჩვენებს ივანიშვილის რეჟიმის ხელშეწყობით ქვეყანაში კრიმინალური სამყაროს გავლენის ზრდას და განუკითხაობას, რომელიც ყველა ქართულ ოჯახს უქმნის საფრთხეს". მათი თქმით, გავრცელებული ვიდეორგოლის "მთავარი გზავნილი სწორედ იმაში მდგომარეობს, რომ ივანიშვილის რეჟიმის მიერ შექმნილ განუკითხაობას ეწირებიან ის ადამიანებიც, რომლებსაც პერსონალურად, მათ ცხოვრებაში არანაირი შეხება არ ჰქონიათ კრიმინალურ სამყაროსთან".

"12 მაისს ფედერალისტებმა გამოვაქვეყნეთ ვიდეო, სადაც პარტიის ერთ-ერთი ლიდერი ელისო ფაჩუაშვილი პერსონალურ ტრაგედიას იხსენებს და ქვეყანაში კრიმინალური სამყაროს გავლენის დაბრუნებაზე საუბრობს.

ვიდეოში მაგალითად მოყვანილია არაერთი გახმაურებული საქმე, მათ შორის ნიკო კვარაცხელიას საზარელი მკვლელობა.

ვიდეოს გამოქვეყნების შემდგომ გარდაცვლილის დედამ, იზა ომაძემ საჯაროდ განაცხადა, რომ ვიდეოში მკვლელობის არასწორ ვერსიას ვავრცელებთ.

პირველ რიგში, გვსურს გამოვხატოთ ღრმა პატივისცემა და თანაგრძნობა ქალბატონი იზას მიმართ, გვესმის, თუ რამხელა ტრაგედიაა დედისთვის ასეთი საზარელი მკვლელობის შედეგად შვილის დაკარგვა.

ამავდროულად, ნიკო კვარაცხელიას მკვლელობა მთელი საზოგადოების ტრაგედიაცაა.

ის, სხვა გახშირებულ მძიმე დანაშაულებთან ერთად, აჩვენებს ივანიშვილის რეჟიმის ხელშეწყობით ქვეყანაში კრიმინალური სამყაროს გავლენის ზრდას და განუკითხაობას, რომელიც ყველა ქართულ ოჯახს უქმნის საფრთხეს.

ამ ვიდეოში მკვლელობის მოტივის შესახებ ბრალდების ოფიციალურ ვერსიას ვციტირებთ, რომელიც მასობრივად გავრცელდა მედიის საშუალებით.

ჩვენი მთავარი გზავნილი სწორედ იმაში მდგომარეობს, რომ ივანიშვილის რეჟიმის მიერ შექმნილ განუკითხაობას ეწირებიან ის ადამიანებიც, რომლებსაც პერსონალურად, მათ ცხოვრებაში არანაირი შეხება არ ჰქონიათ კრიმინალურ სამყაროსთან — და ასეთია ნიკო კვარაცხელიას შემთხვევაც.

ჩვენთვის მნიშვნელოვანი იყო არა კონკრეტული დანაშაულის კრიმინალურ მოტივზე მსჯელობა, არამედ იმ გარემოს ჩვენება, რომელშიც მსგავსი ამაზრზენი დანაშაული ლამის ყოველდღიურობად იქცა.

ფედერალისტები აუცილებლობად მივიჩნევთ, რომ სანამ ივანიშვილის რეჟიმი ძალაუფლებაში რჩება, საზოგადოების მხრიდან იყოს მუდმივი წნეხი ამ ვითარებასთან მიმართებით," — ვკითხულობთ განცხადებაში.

ცნობისთვის, მანამდე იზა ომაძე ფედერალისტების მიერ გავრცელებულ ვიდეორგოლს გამოეხმაურა და პარტიას მკვლელობის მოტივის ცრუ ვერსიის გავრცელებაში დასდო ბრალი. ომაძისთვის ასევე მიუღებელი აღმოჩნდა ვიდეოში გამოყენებული მკვლელობის კადრები, რის შემდეგაც მან ფედერალისტებს ვიდეოს აღება მოსთხოვა. "წაიშალოს ვიდეო! თანაც სასწრაფოდ!", — დაწერა მოკლული ნიკო კვარაცხელიას დედამ სოციალურ ქსელში.