აშშ-ის კონგრესში უკრაინის დახმარების შესახებ კანონპროექტის კენჭისყრაზე გატანის ინიციატივამ უმრავლესობის მხარდაჭერა მოიპოვა. 13 მაისს შესაბამის პეტიციას 218-ე ხელმოწერა დაემატა, რაც იმას ნიშნავს, რომ უკრაინის სამხედრო და ფინანსური მხარდაჭერის პაკეტი კენჭისყრაზე რესპუბლიკელი ლიდერების ნების საწინააღმდეგოდ გავა. ამის შესახებ ინფორმაციას THE HILL ავრცელებს.

პროცესისთვის გადამწყვეტი აღმოჩნდა კალიფორნიელი კონგრესმენის, კევინ კილის პოზიცია. კილი, რომელიც ადრე რესპუბლიკელი იყო, ახლა კი დამოუკიდებელი დეპუტატის სტატუსით სარგებლობს, პეტიციას ოთხშაბათს დილით შეუერთდა.

დოკუმენტს ხელი მოაწერა ყველა დემოკრატმა და ორმა რესპუბლიკელმა — ბრაიან ფიტცპატრიკმა და დონ ბეიკონმა.

კანონპროექტი, რომლის ავტორიც კონგრესმენი გრეგ მიქსია, რამდენიმე კრიტიკულად მნიშვნელოვან პუნქტს მოიცავს: უკრაინისთვის დამატებითი შეიარაღებისა და სამხედრო დაფინანსების გამოყოფას; რუსეთის წინააღმდეგ ახალი ეკონომიკური შეზღუდვების დაწესებასა და ომის შემდგომი უკრაინის რეაბილიტაციის ფონდების შექმნას. ასევე, დოკუმენტი ხაზგასმით ადასტურებს აშშ-ის ერთგულებას ჩრდილოატლანტიკური ხელშეკრულების მე-5 მუხლის მიმართ.

კევინ კილის განმარტებით, კანონმდებლობა აუცილებელია არა მხოლოდ უკრაინის გასაძლიერებლად, არამედ რუსეთისთვის სიგნალის გასაგზავნად, რათა მან არ დაუჭიროს მხარი ირანს აშშ-ის წინააღმდეგ მიმდინარე კონფლიქტში.

THE HILL წერს, რომ საკითხი განსაკუთრებით მწვავეა NATO-სთან მიმართებით. პრეზიდენტმა ტრამპმა ალიანსი არაერთხელ გააკრიტიკა, განსაკუთრებით მას შემდეგ, რაც ზოგიერთმა მოკავშირემ ირანთან კონფლიქტში აშშ-სა და ისრაელს მხარი არ დაუჭირა.

"NATO იქ არ იყო, როცა ჩვენ გვჭირდებოდა," — დაწერა მან ცოტა ხნის წინ.

მიქსის კანონპროექტი ამ რიტორიკას პირდაპირ ეწინააღმდეგება და NATO-ს გლობალური მშვიდობისთვის სასიცოცხლოდ მნიშვნელოვან ინსტიტუტად აცხადებს.

ეს ამჟამინდელი კონგრესის პერიოდში მეექვსე შემთხვევა, როდესაც "გამოსახმობმა პეტიციამ" წარმატებას მიაღწია. ეს სტატისტიკა უჩვეულოა, რადგან ბოლო 25 წლის განმავლობაში მსგავსი რამ მხოლოდ ერთეულ შემთხვევებში ხდებოდა.