შინაგან საქმეთა სამინისტროს განსაკუთრებულ დავალებათა დეპარტამენტის ყოფილმა მაღალჩინოსანმა, ირაკლი შაიშმელაშვილმა ამერიკის შეერთებულ შტატებში პოლიტიკური თავშესაფარი მიიღო. აღნიშნული ინფორმაცია "ტვ პირველის" ეთერში "მართლმსაჯულების სახლის" დამფუძნებელმა, იურისტმა ეკა ბესელიამ გაავრცელა.

ბესელიამ აღნიშნა, რომ შაიშმელაშვილისთვის პოლიტიკური დევნილის სტატუსის მინიჭება იმის ოფიციალური დადასტურებაა, რომ ყოფილ ძალოვანზე, რომელმაც სისტემა ამხილა, საქართველოში პოლიტიკური დევნა მიმდინარეობდა.

"როდესაც ირაკლი შაიშმელაშვილს შენ ორი წლით თავისუფლების აღკვეთას უსჯი, ადამიანს, რომელმაც აჩვენა ის გამბედაობა და ის პასუხისმგებლობა, რასაც ჩვენ ველოდებით პოლიციელებისგან, რომ არ შეასრულონ უკანონო დავალება, ამხილა ეს რეპრესიული სისტემა, მთელი შიდა ძალიან მძიმე ვითარება და თქვა რომ მე ამას არ გავაკეთებ და წავიდა. წავიდა, მაგრამ მას დააწიეს სისხლის სამართლის საქმე, სადაც, სხვათა შორის, არ ვიცი უკვე გასაჯაროვდა თუ არა ეს ინფორმაცია, მაგრამ შემიძლია უკვე გითხრათ, რომ მან მიიღო ამერიკის სახელმწიფოსგან პოლიტიკური თავშესაფარი და ჩვენ მივიღეთ ეს ოფიციალური დადასტურება, ვიყავით ამ პროცესთან ძალიან ახლოს, იცით, რომ ჩვენი იურიდიული ჯგუფი მუშაობს მის საქმეზე აქ ქართულ სასამართლოში, თუმცა გვქონდა ასევე კონტაქტი მის უცხოელ ადვოკატებთან. ეს ძალიან მნიშვნელოვანი სიგნალია იმიტომ, რომ ეს პირველი ფაქტია ამ პოლიტიკური დაპატიმრებებიდან, ვინც ეს სტატუსი მიიღო და მიიღოს სწორედ იმის გამო, რომ პოლიტიკური დევნა მიმდინარეობდა საქართველოში", — განაცხადა ბესელიამ.

ამ საკითხს პარლამენტის თავმჯდომარე შალვა პაპუაშვილი გამოეხმაურა, რომელმაც აღნიშნა, რომ ეს ინფორმაცია არ დადასტურებულა და თავად შაიშმელაშვილსაც არაფერი უთქვამს. მისივე თქმით, "სხვას თუ უნდა რომ ვინმე კრიმინალი თავისთან ჰყავდეს, ესეც იმ ქვეყნის არჩევანია".

"მე ავხსნა? მე მგონი შეერთებულმა შტატებმა უნდა ახსნას, თუკი ეს ასე არის. არ ვიცი ეს ასე არის თუ არ არის. ეს მას არ უთქვამს. მე რამდენადაც გავეცანი, რომ ერთ-ერთმა ქართველმა პოლიტიკოსმა თქვა, რომ მას მისცეს თავშესაფარი. ჯერ თვითონ თქვას, ეს ასე არის თუ არა და მერე... ჩვენ ვეძებთ ჩვენს კრიმინალებს. რაც უფრო მალე მივწვდებით და რაც უფრო მალე მოხვდებიან სასჯელაღსრულების დაწესებულებაში, მით უფრო კარგი. სხვას თუ უნდა, რომ ვინმე კრიმინალი თავისთან ჰყავდეს, ესეც იმ ქვეყნის არჩევანია. აგერ უკრაინას ხელისუფლებაში ჰყავს ქართველი კრიმინალები ადეიშვილის და გია ლორთქიფანიძის სახით. მოთმინებით ველოდით მიხეილ სააკაშვილს და ხედავთ, რომ ის ახლა იხდის სასჯელს", — თქვა შალვა პაპუაშვილმა.

შეგახსენებთ, ირაკლი შაიშმელაშვილმა შინაგან საქმეთა სამინისტრო 2024 წლის 3 დეკემბერს, პროევროპული აქციების ძალისმიერი დარბევის ფონზე, პროტესტის ნიშნად დატოვა. სისტემიდან წასვლისა და ქვეყნიდან გამგზავრების შემდეგ, პროკურატურამ მის წინააღმდეგ სისხლის სამართლის საქმე აღძრა.

2026 წლის 7 მაისს თბილისის საქალაქო სასამართლოს მოსამართლე ირაკლი ხუსკივაძემ შაიშმელაშვილს დაუსწრებლად 2 წლით თავისუფლების აღკვეთა მიუსაჯა. საქმე 2025 წლის 4 ოქტომბრის მოვლენებს ეხება, რომელზეც სხვა ბრალდებულ პოლიტიკოსებსა და პირებსაც მიესაჯათ სხვადასხვა ვადით პატიმრობა. შაიშმელაშვილი ამჟამად ამერიკის შეერთებულ შტატებში იმყოფება.