სამთავრობო ტელეკომპანია "იმედს" ევროპარლამენტში საქმიანობა ერთი წლით აეკრძალა, ხოლო მოლდოვამ — "იმედს", "რუსთავი ორსა" და "პოსტივის", ევროპის საბჭოს მინისტრთა კომიტეტის 135-ე სესიის გაშუქებაზე უარი უთხრა. ინფორმაციას ტელეკომპანია "იმედი" ავრცელებს.

მოლდოვის საგარეო უწყება აკრედიტაციაზე უარს ფორმალური პასუხით ხსნის. მათ ოფიციალურ წერილში ვკითხულობთ, რომ განხილვის შემდეგ, ტელეკომპანიების მოთხოვნები არ დადასტურდა და დამატებითი კომენტარების გაკეთება ინდივიდუალური აკრედიტაციის შეფასებებთან ან შიდა განხილვის პროცედურებთან დაკავშირებით არ შეუძლიათ.

"გთხოვთ გაითვალისწინოთ, რომ ევროპის საბჭოს მინისტრთა კომიტეტის 135-ე სესიისთვის აკრედიტაციის მოთხოვნები კომპეტენტურმა ორგანოებმა განიხილეს. მოქმედი ეროვნული კანონმდებლობისა და მოლდოვას რესპუბლიკაში "უცხოელი ჟურნალისტების აკრედიტაციის შესახებ რეგულაციის" შესაბამისად. აკრედიტაციის პროცესი ყველა განმცხადებლისთვის სტანდარტული შეფასების პროცედურას მოიცავს. ამ განხილვის შემდეგ, თქვენი მოთხოვნა არ დადასტურდა. პატივისცემით აღვნიშნავთ, რომ ჩვენ არ შეგვიძლია დამატებითი კომენტარების გაკეთება ინდივიდუალური აკრედიტაციის შეფასებებთან ან შიდა განხილვის პროცედურებთან დაკავშირებით", — აღნიშნულია წერილში.

როგორც ტელეკომპანია "იმედი" წერს, დახმარებისთვის ევროპის საბჭოსაც მიმართეს, რათა გაერკვიათ, მიიჩნევს თუ არა ორგანიზაცია ამ ნაბიჯს მედიაზე თავდასხმად, თუმცა პასუხი ამ დრომდე არ მიუღიათ.

ევროპარლამენტის მიერ გამოგზავნილი წერილის მიხედვით, "იმედს" მუშაობა 1 წლით აეკრძალა. მიზეზად დასახელებულია "იმედის კვირის" რეპორტაჟი, რასა იუკნევიჩიანესთან ინტერვიუს ჩაწერის მცდელობა. "იმედი" წერს, რომ სავარაუდოდ მეორე მიზეზი მარკეტა გრეგოროვას უკმაყოფილებაა გადამღები ჯგუფის იქ ყოფნის გამო.

ტელეკომპანია "იმედი" მიიჩნევს, რომ სანქცია არაადეკვატურად მკაცრია და ზღუდავს საზოგადოების უფლებას, მიიღოს ინფორმაცია. მათ წერილში ნათქვამია, რომ მათთვის გაურკვეველი დარჩა, თუ კონკრეტულად რა ქმედება ჩაითვალა წესებთან შეუსაბამოდ და რა კონკრეტული სტანდარტის დაცვა იყო საჭირო მოცემულ ვითარებაში. მათივე განმარტებით, შეზღუდვა არაპროპორციულია.

"შესაბამისად, ჩვენთვის გაურკვეველი დარჩა, თუ კონკრეტულად რა ქმედება ჩაითვალა წესებთან შეუსაბამოდ და რა კონკრეტული სტანდარტის დაცვა იყო საჭირო მოცემულ ვითარებაში. ამ გარემოების გათვალისწინებით, გვინდა გამოვხატოთ შეშფოთება მიღებული გადაწყვეტილების პროპორციულობასთან დაკავშირებით. ერთწლიანი შეზღუდვა წარმოადგენს განსაკუთრებით მკაცრ ზომას, რომელიც არსებითად გავლენას ახდენს მედიის შესაძლებლობაზე, გააშუქოს ევროპარლამენტის საქმიანობა. მიგვაჩნია, რომ მსგავს შემთხვევებში განსაკუთრებული მნიშვნელობა აქვს პროპორციულობის პრინციპის დაცვას, მათ შორის იმ გარემოების გათვალისწინებას, რომ 22 აპრილის გაფრთხილების შემდეგ ჩვენ თავად მოვითხოვეთ დამატებითი განმარტებები. როგორც მედია ორგანიზაცია, ჩვენ ვასრულებთ საზოგადოებისთვის მნიშვნელოვანი ინფორმაციის გავრცელების ფუნქციას. ევროპარლამენტის საქმიანობის გაშუქება წარმოადგენს მაღალი საზოგადოებრივი ინტერესის საკითხს, ხოლო ჟურნალისტებისთვის წვდომის ხანგრძლივი შეზღუდვა გავლენას ახდენს არამხოლოდ კონკრეტული მედიის საქმიანობაზე, არამედ საზოგადოების შესაძლებლობაზე, დროულად და სრულყოფილად მიიღოს ინფორმაცია ევროპული დემოკრატიული ინსტიტუტების მუშაობის შესახებ", — აღნიშნულია წერილში.

ტელეკომპანია "იმედისთვის" ევროპარლამენტში საქმიანობის ერთწლიანი აკრძალვის შესახებ ცნობების გავრცელების შემდეგ "ევროსკოპმა" 22 აპრილით დათარიღებული წერილი გამოაქვეყნა, რომელიც, მათი წყაროს ინფორმაციით, სამ ქართულ მაუწყებელს — "იმედს", "რუსთავი 2"-სა და "პოსტივის" გაეგზავნა. დოკუმენტში საუბარია ეთიკისა და ქცევის ნორმების დარღვევაზე. კერძოდ, ტექსტში აღნიშნულია, რომ

"წესების თანახმად, "მედიის წარმომადგენლებმა სათანადო პატივი უნდა სცენ ევროპარლამენტის შენობებში მყოფი ყველა პირის ღირსებასა და პირად ცხოვრებას" — მუხლი 7…. გთხოვთ, გაითვალისწინოთ, რომ ჩვენი სამსახურები აცნობებენ ინსტიტუციათაშორის აკრედიტაციის კომიტეტს ამ შემთხვევის შესახებ შემდგომი რეაგირებისა და შესაძლო სანქციებისთვის", — აღნიშნულია წერილში.