ჟურნალისტი გურამ როგავა ბრიუსელში გამართული შეხვედრების შესახებ ინფორმაციას ავრცელებს. მისი თქმით, ევროპარლამენტში იგი ევროპარლამენტარებს რასა იუკნევიჩიანესა და პოლონელ დეპუტატ კშიშტოფ ბრეიზას შეხვდა. როგავას განცხადებით, ბრეიზამ უდიდესი წვლილი შეიტანა ტელეკომპანია "იმედის" დასანქცირების პროცესში.

გურამ როგავა სოციალურ ქსელში კშიშტოფ ბრეიზას მიმართვასაც ავრცელებს, სადაც პოლონელი დეპუტატი აცხადებს, რომ მისი ოფისის ხუთთვიანი მუშაობის შედეგია ის, რომ "ქართული ოცნების რეჟიმის მიერ კონტროლირებად სამ პროპაგანდისტულ მედიასაშუალებას — რომლებიც სულ უფრო მეტად "რუსულ ოცნებას" ემსგავსებიან — სანქციები დაეკისრათ და ერთი წლით ევროპარლამენტში მუშაობა აეკრძალათ".

"ვამაყობ, რომ საქართველოს შესახებ ანგარიშში ჩემს მიერ შეტანილმა ცვლილებებმა, ევროპარლამენტის პრეზიდენტთან და პრესის აკრედიტაციის განყოფილებასთან ერთად ჩემი ოფისის ხუთთვიანმა შრომამ, კონკრეტული შედეგები გამოიღო: ქართული ოცნების რეჟიმის მიერ კონტროლირებად სამ პროპაგანდისტულ მედიასაშუალებას — რომლებიც სულ უფრო მეტად "რუსულ ოცნებას" ემსგავსებიან — სანქციები დაეკისრათ და ერთი წლით ევროპარლამენტში მუშაობა აეკრძალათ. ეს მხოლოდ დასაწყისია ქართველი ხალხის გამარჯვებისა რუსეთის გავლენასა და ავტორიტარულ რეჟიმზე, პროპაგანდასთან ერთად. ჩვენ საქართველოს ხალხის გვერდით ვდგავართ და ვმოქმედებთ", — განაცხადა ბრეიზამ.

როგორც გურამ როგავა წერს, ბრიუსელში გამართულ შეხვედრაზე საუბარი შეეხო იმ ბერკეტებს, რომელთა გამოყენებაც ევროპელ პარტნიორებს ქართულ მედიაზე რუსული გავლენების შესამცირებლად შეუძლიათ.

ჟურნალისტი აღნიშნავს, რომ მხარეები "ძალიან კარგ ინიციატივაზე" შეთანხმდნენ, რომლის დეტალებიც საზოგადოებისთვის დაახლოებით ერთ თვეში გახდება ცნობილი. როგავას თქმით, მიზანი ქართულ მედიაში "რუსული საცეცების მოშთობაა".

შეგახსენებთ, სამთავრობო ტელეკომპანია "იმედს" ევროპარლამენტში საქმიანობა ერთი წლით აეკრძალა, ხოლო მოლდოვამ — "იმედს", "რუსთავი ორსა" და "პოსტივის", ევროპის საბჭოს მინისტრთა კომიტეტის 135-ე სესიის გაშუქებაზე უარი უთხრა.