ლოს-ანჯელესის სასამართლომ მეთიუ პერის გარდაცვალების საქმეზე ნარკოდამოკიდებულების კონსულტანტს, 56 წლის ერიკ ფლემინგს, ორწლიანი პატიმრობა მიუსაჯა. მან ბრალი ჯერ კიდევ 2024 წელს აღიარა.

მეთიუ პერი, რომელიც წლების განმავლობაში ნარკოდამოკიდებულებასა და ფსიქიკურ პრობლემებს ებრძოდა, საკუთარ სახლში, ჯაკუზიში გარდაცვლილი იპოვეს. ის კეტამინს დეპრესიის სამკურნალოდ, ლეგალურად იყენებდა, თუმცა მას შემდეგ, რაც ექიმმა დოზის გაზრდაზე უარი უთხრა, მსახიობმა პრეპარატის სხვა გზებით მოპოვება დაიწყო.

გამოძიებამ დაადგინა, რომ სწორედ ერიკ ფლემინგმა დააკავშირა მეთიუ პერი ჯასვინ სანგასთან, რომელსაც პროკურატურა "კეტამინის დედოფალს" უწოდებს. ფლემინგი კეტამინს სანგასგან ყიდულობდა, ფასს უმატებდა და მეთიუ პერის სახლში მიჰქონდა, სადაც პრეპარატს მსახიობის ასისტენტზე ყიდდა. როგორც ირკვევა, ფლემინგმა გამოძიებასთან პირველივე დღეებში ითანამშრომლა და სანგას წინააღმდეგ ჩვენება მისცა.

მეთიუ პერის ნარკოკონსულტანტი, ერიკ ფლემინგი

ფოტო: AP

"კეტამინი მეთიუსთვის იმიტომ მიმქონდა, რომ ფული მჭირდებოდა. ყველაზე უარეს შედეგზე არასდროს მიფიქრია. ეს საბედისწერო შეცდომა სამუდამოდ მოსვენებას დამიკარგავს", — ნათქვამია ფლემინგის წერილში, რომელიც მან სასამართლოს გაუგზავნა, — "ეს ნამდვილი კოშმარია, რომლისგანაც ვერ ვიღვიძებ. ჩემი შეცდომები მოსვენებას არ მაძლევს".

სიკვდილამდე ოთხი დღით ადრე, ერიკ ფლემინგმა მსახიობს $6 000 ღირებულების 25 ფლაკონი მიაწოდა. სწორედ ამ პარტიიდან გაუკეთა ასისტენტმა მეთიუ პერის ის საბედისწერო ინიექცია, რომელმაც 54 წლის ვარსკვლავის სიცოცხლე იმსხვერპლა. ასისტენტს განაჩენს ორ კვირაში გამოუტანენ.

ერიკ ფლემინგი მეოთხე ბრალდებულია, რომელსაც მსახიობის სიკვდილის საქმეზე განაჩენი გამოუტანეს. ბრალი სულ ხუთ ადამიანს აქვს წაყენებული, მათ შორის ორ ექიმს, მსახიობის ასისტენტს და ნარკოდილერს. მიუხედავად იმისა, რომ სასიკვდილო დოზა მსახიობისთვის ექიმებს არ მიუწოდებიათ, მოსამართლემ განაცხადა, რომ მათ პერის ტრაგიკულ დასასრულს ხელი შეუწყვეს, რადგან "მის ნარკოდამოკიდებულებას მუდმივად კვებავდნენ".

კანონმდებლობის მიხედვით, ფლემინგს ოთხწლიანი პატიმრობა ემუქრებოდა, თუმცა გამოძიებასთან თანამშრომლობის გამო სასჯელი შეუმცირდა. მისი ადვოკატები კიდევ უფრო შემსუბუქებულ განაჩენს — სამთვიან პატიმრობასა და სარეაბილიტაციო ცენტრში მკურნალობას ითხოვდნენ, რადგან ბრალდებული დანაშაულის გამოსასყიდად ყველაფერს აკეთებდა.