პარლამენტმა "ლიცენზიების და ნებართვების შესახებ" კანონში ცვლილებები პირველი მოსმენით მიიღო. ცვლილებების მიხედვით, თბილისში კულტურული მემკვიდრეობის ძეგლებზე მერია სამუშაო ნებართავს მთავრობის ნაცვლად საკრებულოსგან მიიღებს.

კანონპროექტის განმარტებით ბარათში ვკითხულობთ, რომ "კანონპროექტის შემუშავება კულტურული მემკვიდრეობის ძეგლზე სამუშაოების წარმოებისას პრაქტიკაში წამოჭრილმა პრობლემებმა განაპირობა". საკანონმდებლო ცვლილების ინიციატორების განმარტებით, "კანონპროექტს შესაძლოა ჰქონდეს დადებითი გავლენა ქალაქ თბილისის მუნიციპალიტეტის
ბიუჯეტის ხარჯვით ნაწილზე".

"დაიზოგება კომპენსაციის სახით გასაცემი ის თანხა, რომლითაც სარეაბილტაციო სამუშაოების განმავლობაში, უზრუნველყოფილნი არიან მესაკუთრეები და რომელიც იფარება თვითმმართველი ერთეულის საბიუჯეტო ასიგნებებიდან. გავლენის ოდენობა დამოკიდებულია შემთხვევათა რაოდენობაზე. ამასთანავე, ქალაქ თბილისის მუნიციპალიტეტის შემთხვევაში, კულტურულ მემკვიდრეობის ძეგლზე სამუშაოებისთვის სამშენებლო დოკუმენტაციის წარმოებისა და შეთანხმების წესის დადგენის უფლებამოსილების განხორციელებასთან დაკავშირებული ხარჯები (ასეთის არსებობის შემთხვევაში) დაიფარება ქალაქ თბილისის მუნიციპალიტეტის საკრებულოსთვის გამოყოფილი ასიგნებების ფარგლებში," — ვკითხულობთ ბარათში.

კულტურის კომიტეტის თავმჯდომარემ, გიორგი გაბუნიამ პარლამენტის პლენარულ სხდომაზე განაცხადა, რომ კანონპროექტში შეტანილი ცვლილება საშუალებას მისცემს თბილისის მუნიციპალიტეტის მერიასა და ქალაქ თბილისის მუნიციპალიტეტის მიერ დაფუძნებულ იურიდიულ პირს, გამარტივებული წესით მოახდინოს საპროექტო დოკუმენტაციის შეთანხმება უფლებამოსილ ადმინისტრაციულ ორგანოში.

"წარმოდგენილი საკანონმდებლო ცვლილება ემსახურება კულტურული მემკვიდრეობის დაცვის სფეროში ადმინისტრაციული პროცესების გაუმჯობესებას, გადაწყვეტილებების მიღების ეფექტიანობის ზრდას და სარეაბილიტაციო სამუშაოების განხორციელების ხელშეწყობას," — განაცხადა გიორგი გაბუნიამ.