საქართველოს საგარეო საქმეთა სამინისტრო მოსახლეობას მოუწოდებს, რომ გადაუდებელი აუცილებლობის არარსებობის შემთხვევაში იტალიაში გამგზავრებისგან თავი შეიკავონ.

უწყებაში ამბობენ, რომ დაინფიცირების მაღალი მაჩვენებელი დაფიქსირდა ჩრდილოეთ იტალიაში, კერძოდ კი: ლომბარდიაში, ვენეტოში, ემილია რომანიაში. ასევე დაინფიცირების ცალკეული შემთხვევები დაფიქსირდა: ლაციოში, აბრუცოში, ბაზილიკატაში, კამპანიაში, პულიაში, კალაბრიაში, სიცილიაში, მარკეში, ფრიული ვენეცია ჯულიაში, ტოსკანაში, პიემონტეში, ბოლცანოსა და ლიგურიაში.

გარდა ამისა, სამინისტრო მოუწოდებს მოქალაქეებს, რომ გაითვალისწინონ ის გარემოებაც, რომ რომ ცალკეულმა სახელმწიფოებმა და ავიაკომპანიებმა მიიღეს გადაწყვეტილება იტალიის მიმართულებით ავიამიმოსვლის დროებით შეჩერების ან ფრენების სიხშირის შეზღუდვის შესახებ, რაც მნიშვნელოვნად აფერხებს მგზავრობის შესაძლებლობას იტალიის მიმართულებით და პირიქით.

საჭიროების შემთხვევაში საქართველოს მოქალაქეები უნდა დაუკავშირდნენ საქართველოს საელჩოს ქალაქ რომში ცხელი ხაზის ნომერზე +333 8879123.

საქართველოს საელჩო იტალიის რესპუბლიკაში მყოფ საქართველოს იმ მოქალაქეებს, ვისაც აქვს იდენტიფიცირებული საკუთარი თავი საქართველოს საკონსულო დაწესებულებაში, ასევე იტალიაში მოქმედ საქართველოს დიასპორულ ორგანიზაციებს უგზავნის რეკომენდაციებს ვირუსის პრევენციისთვის მისაღები საჭირო ზომების და მათ შორის არსებული შეზღუდვების შესახებ.