საპარლამენტო უმრავლესობის ლიდერი, მამუკა მდინარაძე რუსეთის მხრიდან თავდასხმების და ოპოზიციის გააქტიურების დროში თანხვედრას უსვამს ხაზს და ამბობს, რომ ოპოზიცია რუსულ საქმეს აკეთებს. მისი თქმით, რუსებისა და ნაციონალური მოძრაობის ერთდროულად "შემოტევების ფორმულა" ლაგდება.

"ნაცები გვიტევდნენ შიგნით, რუსები გვიტევენ გარედან და ეს ფორმულა ლაგდება. ფაქტი ერთ მხარეს არის, მათი ეს პროდასავლური რიტორიკა რჩება გვერდზე, როდესაც რეალურად ვხედავთ, რომ ისინი რუსულ საქმეს აკეთებენ ხოლმე. ამ დროს ემთხვევა რუსეთის მხრიდან გარედან შემოტევები. შეგიძლიათ გაიხსენოთ იმ პერიოდში რა რიტორიკას ჰქონდა მათი მხრიდან ადგილი, რას ამბობდნენ ამ კიბერშეტევაზე და რეალურად რა დადგინდა გამოძიების მხრიდან", — განუცხადა იმედს მდინარაძემ.

საგარეო საქმეთა სამინისტროს ინფორმაციით, საერთაშორისო პარტნიორებთან თანამშრომლობით გაირკვა, რომ კიბერშეტევა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ დაიგეგმა და განხორციელდა.

2019 წლის 28 ოქტომბერს ერთდროულად 15 ათასზე მეტი ვებგვერდი დაიჰაკა. კიბერთავდასხმის მსხვერპლი პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოს, სახელმწიფო, კომერციული და მედია ორგანიზაციების ვებგვერდები გახდა. მაშინ ვებგვერდებზე გამოჩნდა ყოფილი პრეზიდენტის, მიხეილ სააკაშვილის ფოტო წარწერით "I'll Be Back".

გაიგეთ მეტი: