აშშ-ს სახელმწიფო მდივანი, მაიკ პომპეო გმობს საქართველოს ვებგვერდებზე რუსეთის ფართომასშტაბიან კიბერშეტევას. ამის შესახებ სახელმწიფო მდივანმა ტვიტერზე დაწერა:

"საქართველოსთან ერთად ვგმობთ რუსეთის კიბერშეტევას ქართველი ხალხისა და ინსტიტუტების წინააღმდეგ. რუსეთმა დაუყოვნებლივ უნდა შეწყვიტოს მსგავსი ქმედებები საქართველოსა და ნებისმიერ სხვა ადგილას. კიბერსივრცის სტაბილურობა ყველა ერის პასუხისმგებლიან ქცევაზეა დამოკიდებული".

საქართველოს საგარეო საქმეთა სამინისტროს განცხადებით, საერთაშორისო პარტნიორებთან თანამშრომლობით კიბერთავდასხმაში რუსული კვალი გამოკვეთეს. მათი განმარტებით, კიბერშეტევა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ დაიგეგმა და განხორციელდა.

2019 წლის 28 ოქტომბერს ერთდროულად 15 ათასზე მეტი ვებგვერდი დაიჰაკა. კიბერთავდასხმის მსხვერპლი პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოს, სახელმწიფო, კომერციული და მედია ორგანიზაციების ვებგვერდები გახდა. მაშინ ვებგვერდებზე გამოჩნდა ყოფილი პრეზიდენტის, მიხეილ სააკაშვილის ფოტო წარწერით "I'll Be Back".