News Georgia-სთან ინტერვიუს დროს, საქართველოს საგარეო საქმეთა მინისტრის მოადგილემ გიგი გიგიაძემ განაცხადა,რომ შაჰ-დენიზის საბადოს განვითარების მეორე ეტაპის დასრულების შემდეგ საქართველო და აზერბაიჯანი მნიშვნელოვან წვლილს შეიტანენ ევროპის ენერგოუსაფრთხოების არქიტექტურაში.

გიგიაძის თქმით, ასევე წარმატებული საერთაშორისო პროექტადაა აღიარებული ბაქო-თბილისი-ყარსის რკინიგზის მშენებლობა, რომელიც 2 ქვეყნის ტერიტორიაზე უკვე დასრულებულია:

"ბაქო-თბილისი-ყარსის რკინიგზის პროექტს, ექსპერტები მსოფლიოს ერთ-ერთ სტრატეგიულ პროექტად აღიარებენ, რაზეც მეტყველებს ის ფაქტიც, რომ 2011 წლის იანვარში, ნიუ-იორკში გამართულ Global Infrastructure Leadership Forum-ზე, იგი მსოფლიოს 100 უმნიშვნელოვანეს გლობალურ პროექტს შორის შეიყვანეს. პროექტის სრულფასოვანი ამოქმედებისათვის აუცილებელია, დასრულდეს პროექტის დარჩენილი, თურქული მონაკვეთი. ვიმედოვნებთ, რომ თურქული მხარე 2016 წლის ბოლოს დაასრულებს ხსენებული მონაკვეთის მშენებლობას".

გიგიაძის განცხადებით, პროექტის წარმატებით დასრულება მნიშვნელოვანია ევროპის ენერგოუსაფრთხოების განმტკიცებისთვის:

"ტრანსპორტისა და ენერგეტიკის სფეროში არსებული ერთობლივი პროექტების რეალიზაციაზე დამოკიდებულია არა მხოლოდ ორივე ქვეყნის, არამედ მთელი რეგიონის კეთილდღეობა და სტაბილურობა.

საქართველოსა და აზერბაიჯანის რესპუბლიკას შორის ეკონომიკური ურთიერთობები დინამიურად ვითარდება. ორივე მხარე ვთანხმდებით, რომ გვაქვს ამ ურთიერთობების კიდევ უფრო გაღრმავების პოტენციალი".

გიგიაძე აღნიშნავს აზერბაიჯანის როლს საქართველოში ეკონომიკის განვითარებაზე და დასძენს, რომ ის სისტემატურად იკავებს ადგილს საქართველოს ძირითადი პირდაპირი ინვესტორი ქვეყნების ათეულში:

"2015 წელს აზერბაიჯანმა საქართველოში 550 მილიონი აშშ დოლარის ინვესტიცია განახორციელა, რაც 61%-ით მეტია 2014 წელთან შედარებით. 2016 წლის პირველი ნახევრის მონაცემებით აზერბაიჯანს 282,5 მლნ აშშ დოლარის ინვესტიცია აქვს განხორციელებული საქართველოში".

საქართველოს საგარეო საქმეთა მინისტრის მოადგილე ხაზს უსვამს საქართველოს როლს აზერბაიჯანისთვის ევროპული ოჯახში შესვლაზე. მისი თქმით, რადგან საქართველოს ევროპასთან თავისუფალი ვაჭრობის ხელშეკრულება აქვს, ის შეიძლება აზერბაიჯანისთვის ერთგვარ ფანჯრადაც კი იქცეს ევროპაში.