რუსეთის ერთ-ერთ ფერმაში ვირტუალური რეალობის სათვალეების გამოყენება დაიწყეს, რომლებიც სპეციალურად ძროხების გონების შესაძლებლობებს მოარგეს.

რუსეთის სოფლის მეურნეობის სამინისტრომ ჩაატარა კვლევა, რომლის მიხედვითაც ძროხის ემოციური განწყობა მის პროდუქტიულობას და შესაბამისად, რძის რაოდენობას ზრდის. ამის გამო ვირტუალური რეალობის სათვალეების გამოყენება დაიწყეს, რათა ცხოველებს სტრესი შეუმცირდეთ და თავი უკეთ იგრძნონ.

რუსეთის სოფლის მეურნეობის სამინისტროს განცხადებით, ექსპერიმენტები რამენსკის რაიონში მდებარე RusMoloko-ს ფერმაში ჩატარდა.

"სხვადასხვა ქვეყნის ფერმების მაგალითი გვაჩვენებს, რომ მშვიდი გარემო რძის რაოდენობას და ხანდახან ხარისხსაც კი მნიშვნელოვნად ზრდის", — ვკითხულობთ განცხადებაში.

ფერმაში მყოფი ძროხები ძირითადად მხოლოდ დახურულ სივრცეში იმყოფებიან, ვირტუალური რეალობის სათვალეებით კი მათ უქმნიან ილუზიას, რომ თავისუფალ გარემოში, მინდორზე ნავარდობენ და ბალახს ძოვენ, რაც მათ განწყობაზე დადებითად აისახება.

ფოტო: რუსეთის სოფლის მეურნეობის სამინისტრო

მეცხოველეობის ინდუსტრიაში ბოლო პერიოდში აქტიურად ცდილობენ, ცხოველების ემოციური მდგომარეობა გააუმჯობესონ: მათ ხშირად სპეციალური ჯაგრისებით ვარცხნიან და მშვიდ მუსიკასაც კი ასმენინებენ. შესაბამისად, ამ მხრივ გადადგმული ნებისმიერი ნაბიჯი მისასალმებლად შეიძლება ჩაითვალოს: თუ ძროხები ვირტუალური რეალობის სათვალეებით თავს უკეთ იგრძნობენ, რატომაც არ უნდა გამოვიყენოთ ის?

თუმცა, ამ ფაქტს იმ ეთიკურ დილემასთან ერთად, რომ ცხოველებისთვის ილუზიის შექმნის ნაცვლად ხომ არ აჯობებდა მათი ცხოვრების პირობები რეალურად გაუმჯობესებულიყო, თან ახლავს კიდევ ერთი კითხვის ნიშანი: რუსეთის სოფლის მეურნეობის სამინისტროს მიერ გამოქვეყნებული კვლევა, რომელზე დაყრდნობითაც გადაწყვიტეს ფერმაში ამ სიახლის დანერგვა, არა რომელიმე ავტორიტეტულმა და გამოცდილმა უნივერსიტეტმა ჩაატარა, არამედ რუსული რძის ინდუსტრიის გამოცემა Milknews.ru-მ, რაც კვლევის შედეგების მიმართ მიკერძოებულობის ნიშნებს აჩენს და უნდობლობას იწვევს.