ისრაელმა "ომის დასრულების ხუთი პრინციპი" მიიღო — ცნობილია ნეთანიაჰუს გეგმები ღაზასთან დაკავშირებით. ინფორმაციას ამის შესახებ BBC ავრცელებს.

იერუსალიმში რამდენიმესაათიანი უსაფრთხოების კაბინეტის სხდომის შემდეგ, ისრაელის პრემიერმინისტრის, ბენიამინ ნეთანიაჰუს ოფისმა განცხადება გაავრცელა, სადაც გეგმა ღაზას ქალაქის ხელში ჩაგდების შესახებ დამტკიცდა.

როგორც განცხადებაში წერია, უსაფრთხოების კაბინეტმა ეს გეგმა უმრავლესობით მიიღო და მას "ომის დასრულების ხუთი პრინციპი" დაამატა.

"ისრაელის თავდაცვის ძალები (IDF) მოემზადება ღაზას ქალაქზე კონტროლის ხელში ჩასაგდებად, პარალელურად კი უზრუნველყოფს ჰუმანიტარულ დახმარებას სამოქალაქო მოსახლეობისთვის საბრძოლო ზონების მიღმა," — ნათქვამია განცხადებაში, სადაც დეტალურად არის ჩამოთვლილი "ომის დასრულების პრინციპები":

1.ჰამასის განიარაღება;

2.ყველა მძევლის დაბრუნება — ცოცხლებისაც და დაღუპულებისაც;

3.ღაზას სექტორის დემილიტარიზაცია;

4.ისრაელის უსაფრთხოების კონტროლი ღაზას სექტორზე;

5.ალტერნატიული სამოქალაქო ხელისუფლების არსებობა, რომელიც არ იქნება ჰამასი ან პალესტინის ადმინისტრაცია;

"კაბინეტის მინისტრთა აბსოლუტური უმრავლესობა მიიჩნევს, რომ ალტერნატიული გეგმა, რომელიც კაბინეტს წარედგინა, ვერ უზრუნველყოფს ჰამასის დამარცხებას ან მძევლების დაბრუნებას," — წერია განცხადებაში.