"ქართული ოცნების" პრემიერმინისტრის, ირაკლი კობახიძის განცხადებით გიორგი ახობაძის საქმეში "ჩადების" ფაქტი არ ფიქსირდება და ვიდეო სამხილის არ არსებობის გამო გაამართლეს. კობახიძემ ახობაძის საქმეზე საუბრისას ასევე დასძინა, რომ "მაშინაც კი, როცა იცის, რომ ადამიანი არის ნარკომანი, მოიხმარს და ასაღებს ნარკოტიკებს, თუ არ არის 100%-იანი მტკიცებულები სასამართლოს ევალება გაათავისუფლოს ადამიანი".

"საქართველოში არის მაღალი სამართლებრივი სტანდარტი. ერთ-ერთი მიზეზი იმისა, რომ 1000 მოძალადიდან მხოლოდ 20-ია დაკავებული, ამის მიზეზიც არის მაღალი სამართლებრივი სტანდარტი. გამომდინარე იქიდან, რომ 100%-იანი არ იყო მტკიცებულებები, 1%-ი მაინც თუ რჩება, სასამართლო ვალდებულია, გაათავისუფლოს ადამიანი. მაშინაც კი, როცა იცის, რომ ადამიანი არის ნარკომანი, მოიხმარს და ასაღებს ნარკოტიკებს, თუ არ არის 100%-იანი მტკიცებულები სასამართლოს ევალება გაათავისუფლოს ადამიანი.

ვიდეო რომ არ იყო გადაღებული, სწორედ ამიტომ გაათავისუფლეს ახობაძე პატიმრობიდან. არაფერ შუაში არ არის "ჩადება". 100%-იანი მტკიცებულების სტანდარტზე არის საუბარი. ერთი რამ მინდა გირჩიოთ, აქ საქმე არ ეხება არც ახობაძეს, არც პეტრეს და არც პავლეს — ნუ გამოაცხადებთ ადამიანებს გმირებად, რომლებიც ბავშვებს მორფს ჰპარავდნენ," — თქვა ირაკლი კობახიძემ.

მოსამართლე რომეო ტყეშელაშვილმა პროევროპულ აქციებში მონაწილეობისთვის დაკავებული გიორგი ახობაძე უდანაშაულოდ ცნო. მოსამართლემ გადაწყვეტილება მტკიცებულებების არ არსებობიდან გამომდინარე მიიღო.

გიორგი ახობაძეს სისხლის სამართლის კოდექსის 260-ე მუხლის მე-6 ნაწილით ჰქონდა წარდგენილი, რაც დიდი ოდენობით ნარკოტიკული საშუალებების უკანონო შეძენა-შენახვას გულისხმობს. ბრალი 8-დან 20 წლამდე ან უვადო პატიმრობას ითვალისწინებს.

გიორგი ახობაძის საქმე ვრცლად იხილეთ: