დავით ლომიძესა და თემურ ზასოხაშვილს 4 წლითა და 6 თვით თავისუფლების აღკვეთა მიესაჯათ — განაჩენი მოსამართლე ნინო გალუსტაშვილმა გამოიტანა.

პროევროპულ აქციებში მონაწილეობისთვის დაკავებულ ლომიძეს და ზასოხაშვილს პოლიციელებისთვის და წყლის ჭავლის მანქანისთვის ე.წ მოლოტოვის კოქტეილის სროლას ედავებოდნენ. გამოძიება სისხლის სამართლის კოდექსის 353-ე პრიმა მუხლის პირველი ნაწილით მიმდინარეობდა რაც 4-დან 7 წლამდე პატიმრობას ითვალისწინებს.

საქმეში დაზარალებულად აღიარებულ პირებს ფიზიკური დაზიანებები არ აღენიშნებათ და ბრალდებულები ბრალს არ აღიარებენ.

დავით ლომიძისა და თემურ ზასოხაშვილის საქმე

52 წლის დავით ლომიძეს და 38 წლის თემურ ზასოხაშვილს პოლიციელებზე თავდასხმას ედავებიან 2024 წლის 1 დეკემბერს თბილისში გამართული საპროტესტო აქციის დროს. კერძოდ, ბრალდების მხარის მტკიცებით, მათ "მოლოტოვის კოქტეილები" ესროლეს პარლამენტთან მობილიზებულ სპეცრაზმს, რის შედეგადაც დაზიანდა წყლის ჭავლის მანქანა. თუმცა ვიდეოკადრები, რომლებიც სავარაუდოდ მომხდარს ასახავს, ბუნდოვანია და ბრალდებულთა ამოცნობა – პრაქტიკულად შეუძლებელი. ერთადერთი პირდაპირი მტკიცებულება შსს-ს თანამშრომელთა ჩვენებებია, თუმცა, როგორც ადვოკატები ამტკიცებენ, ისინი იდენტურია და საქმეში არც ჰაბიტოსკოპიური ანალიზი დევს, რომელიც დაადგენდა ვიდეოში ნამდვილად დავით ლომიძე და თემურ ზასოხაშვილი არიან თუ არა.

ორივე ბრალდებული აცხადებს, რომ მათზე დაკავებისას იძალადეს. დავით ლომიძის თქმით, ყოფილი კინოცენტრის ტერიტორიაზე დაკავების შემდეგ ის სხვა დემონსტრანტებთან ერთად მიკროავტობუსში ჩასვეს, სადაც სცემეს და წიწაკის სპრეი შეასხეს. ზასოხაშვილიც ნაცემი იყო და ადვოკატმა ის იზოლატორში დასიებული თვალებით, ფაქტობრივად უგონო მდგომარეობაში ნახა. ორივეს აღიარებითი ჩვენება ფსიქოლოგიური ზეწოლის ფონზე მიიღეს.

საქმეში არ არის სახეთა იდენტიფიცირების ანალიზი და მოპოვებულ ნივთმტკიცებებშია — 4 ცალი პრეზერვატივი და ქვა, რაც საერთოდ არ შეესაბამება წაყენებულ ბრალდებას.

"კაცს ედავებიან, მოლოტოვის კოქტეილი ესროლე პოლიციასო და პრეზერვატივებს რომ მოიტანენ, არ მესმის რა შუაშია," — ამბობს ადვოკატი დიმიტრი ვარდიაშვილი.

დავით ლომიძეს მძიმე ჯანმრთელობის მდგომარეობა აქვს და ზურგზე უკვე მეორედ ჩაუტარდა ოპერაცია.