ამერიკის შეერთებული შტატების გენერალური პროკურორის, პამ ბონდის განცხადებით, აშშ-მა ვენესუელის პრეზიდენტის, ნიკოლას მადუროს დაკავებამდე მიმყვანი ინფორმაციისთვის გათვალისწინებული ჯილდო 50 მილიონ დოლარამდე გაზარდა. ინფორმაციას Reuters ავრცელებს.

სოციალურ ქსელში გამოქვეყნებულ ვიდეოში ბონდი მადუროს ისეთ ცნობილ კრიმინალურ ჯგუფებთან თანამშრომლობაში ადანაშაულებს, როგორებიცაა Tren de Aragua და სინალოას კარტელი.

ვენესუელის საგარეო საქმეთა მინისტრმა ივან გილმა ტელეგრამზე დაწერა, რომ ეს განცხადება "ყველაზე აბსურდულია, რაც კი ოდესმე უნახავს".

ცნობისთვის, ჯილდო თავდაპირველად 2020 წელს 15 მილიონ დოლარად განისაზღვრა, როდესაც აშშ-ის პროკურორებმა მადუროს ნარკოტრეფიკში დასდეს ბრალი. 2025 წლის იანვარში, მადუროს მესამე ვადით ფიცის დადების დღეს, ჯილდო 25 მილიონ დოლარამდე გაზარდა, ამასთან ერთად კი დაწესდა ახალი სანქციები მაღალჩინოსნებზე.

2025 წლის თებერვალში აშშ-ის სახელმწიფო დეპარტამენტმა ვენესუელის დაჯგუფება Tren de Aragua უცხოეთის ტერორისტულ ორგანიზაციად აღიარა, MS-13-თან და რამდენიმე მექსიკურ კარტელთან ერთად. ივლისში კი გლობალურ ტერორისტულ ორგანიზაციად აღიარა Cartel de Los Soles.

აშშ-ის სახელმწიფო მდივანმა მარკო რუბიომ განცხადებაში აღნიშნა, რომ მადურო უკვე ათ წელზე მეტია Cartel de Los Soles-ის ლიდერია, რომელიც აშშ-ში ნარკოტიკების უკანონო გადაზიდვებზეა პასუხისმგებელი.