საგარეო საქმეთა მინისტრი, დავით ზალკალიანი ამბობს, რომ რუსეთის საგარეო საქმეთა მინისტრთან, სერგეი ლავროვთან შეხვედრა დროული და საჭირო იყო. ამის შესახებ მინისტრმა პარლამენტში გამოსვლისას განაცხადა.

"თუნდაც უკან დავახვიოთ დრო და ისევ დამაბრუნა იმ პოზიციაში, რა პოზიციაშიც ვიყავი ნიუ-იორკში ჩასვლის დღეებში, მაშინაც და ახლაც დარწმუნებული ვარ, რომ ეს იყო სწორი გადაწყვეტილება", — აღნიშნა ზალკალიანმა.

მინისტრისვე თქმით, შეხვედრის გადაწყვეტილება მათ საერთაშორისო პარტნიორებთან აქტიური კონსულტაციის შედეგად მიიღეს. გარდა ამისა, ზალკალიანმა კიდევ ერთხელ აღნიშნა, რომ შეხვედრა შვეიცარიის ინიციატივითა და ორგანიზებით მოეწყო.

"მთავარი მოტივაცია იყო ის მძიმე მდგომარეობა, რომელიც იყო ბორდერიზაციის მიმართებით".

26 სექტემბერს ნიუ-იორკში გაეროს გენერალური ასამბლეის ფარგლებში გამართულ ერთ-ერთი მაღალი დონის შეხვედრაზე საქართველოსა და რუსეთის საგარეო საქმეთა მინისტრები ერთმანეთს შეხვდნენ. 2008 წლის შემდეგ რუსეთ-საქართველოს საგარეო საქმეთა სამინისტროების წარმომადგენლებს დიპლომატიური კონტაქტი არ ჰქონიათ.

რუსეთის საგარეო საქმეთა სამინისტროს ცნობით, საუბარი შეეხო დღის წესრიგით გათვალისწინებულ საკითხებს, მხარეებმა მოსაზრებები გაცვალეს რეგიონული უსაფრთხოების საკითხებზე. საქართველოს საგარეო საქმეთა სამინისტრომ On.ge-ს განუცხადა, რომ შეხვედრაზე ქართული მხრიდან განხილვის მთავარი თემა საქართველოს ტერიტორიების ოკუპაციის საკითხი იყო.

შევხედრისა და მოლაპარაკებების დეტალებთან დაკავშირებით კითხვები გაუჩნდათ ოპოზიციის წარმომადგენლებს. მათ აინტერესებდათ, რატომ შეხვდა ზალკალიანი ლავროს ისე, რომ წინასწარ ამის შესახებ არავინ იცოდა და მხოლოდ რუსეთის საგარეო საქმეთა სამინისტროს მიერ გავრცელებული განცხადებიდან გახდა ცნობილი.

როგორც ზალკალიანი ამტკიცებს, შეხვედრის შესახებ მან წინა დღეს სხვადასხვა მედიასაშუალებასთან ისაუბრა და ეს გაშუქდა როგორც ტელევიზიით, ისე ონლაინმედიით.

გაიგეთ მეტი: